नेपाली कांग्रेसले आगामी भदौमा २४ देखि २६ गतेसम्म काठमाडौंमा १५ औं महाधिवेशन गर्नेगरी प्रस्ताव गरेको छ ।

मंगलबार दिउँसो बस्ने केन्द्रीय समिति बैठकमा १५ औं महाधिवेशनको कार्यतालिका प्रस्तुत हुँदैछ । जस अनुसार यही चैत २१ गतेदेखि चैत मसान्तसम्म क्रियाशील सदस्यता फारम सबै तहमा पुर्‍याउने र सदस्यता वितरण तथा अद्यावधिक कार्यमा समन्वय गर्न १६५ वटै क्षेत्रमा प्रतिनिधि खटाउने प्रस्ताव छ । 

यस्तै, २०८३ वैशाख १ गतेदेखि मसान्तसम्म ६ हजार ७४३ वटै वडाबाट क्रियाशील सदस्यता वितरण र अद्यावधिक गर्ने प्रस्ताव गरिएको छ । 

प्रत्येक व्यक्तिले आफू सदस्यता भएकै वडाबाट सदस्यता अद्यावधिक गर्ने, सबै वडा र क्षेत्रीय कार्यसमितिलाई आईडी र पासवर्ड वितरण गर्ने र वैशाखभरि वडामा एक महिने सदस्यता अद्यावधिक अभियान सञ्चालन गर्ने कांग्रेसको प्रस्ताव छ ।

जेठ १ देखि १५ सम्म वडाबाट प्रतिनिधिसभा क्षेत्र र जिल्लामा क्रियाशील सदस्यता विवरण बुझाउनुपर्नेछ । 

कार्यतालिका अनुसार क्षेत्र र जिल्लाले इन्ट्री गरेर जेठ २५ गतेसम्म सदस्यता विवरण केन्द्रमा पठाउनुपर्ने, जिल्लास्तरीय क्रियाशील सदस्यता प्रारम्भिक छानबिन समितिमा परेका उजुरीउपर छानबिन गरि केन्द्रमा पठाउने अवधि पनि जेठ मसान्तसम्म प्रस्ताव गरिएको छ । 

प्रस्तावित कार्यतालिका अनुसार असार १५ गतेसम्म केन्द्रले सदस्यतामा आवश्यक छानबिन गरि टुंगो लगाउने भनिएको छ । 

जस अन्तर्गत प्रारम्भिक छानबिन समितिले गरेको निर्णयउपर परेको पुनरावेदन र विवाद र सदस्य भएका स्थान पहिचान गरि सदस्यता रुजु तथा अध्ययन गर्ने एवं अन्तिम टुंगो लगाउने भनिएको छ । 

सदस्यता व्यवस्थापन केन्द्रीय समितिले सदस्यताको अन्तिम सूची केन्द्रीय कार्यसमितिलाई असार १५ सम्म बुझाइसक्नुपर्नेछ । 

आजको बैठकमा यससँगै उम्मेदवारसँग प्रदेशस्तरीय निर्वाचन समीक्षा,  प्रदेश तथा स्थानीय सरकारको प्रभावकारी सञ्चालन र भ्रातृ संघ, शुभेच्छुक संस्था तथा जनसम्पर्क समिति आदि एजेण्डामा छलफल हुँदैछ ।

बैठकमा २१ फागुनमा सम्पन्न निर्वाचन र त्यसबाट कांग्रेसको पक्षमा आएको नतिजाबारे समीक्षा हुने छ। बैठक सभापति थापा नेतृत्वमा बस्न लागेको हो । 

केही दिनअघि पार्टी सभापति गगन थापाले राजीनामा दिएका थिए । निर्वाचनमा पराजय भोगेका कारण नैतिकता देखाउँदै उनले राजीनामा दिएको उल्लेख गरेका थिए । तर गत शुक्रबार र आइतबार बसेको केन्द्रीय समिति बैठकले उनको राजीनामा अस्वीकृत गरेको थियो ।