२८ जेठ २०८३, बिहीबार
प्रधानमन्त्री कप पुरुष एकदिवसीय राष्ट्रिय क्रिकेट प्रतियोगितामा नेपाल पुलिस क्लबले अर्को विभागीय टोली सशस्त्र प्रहरी बलको एपीएफ क्लबलाई एक सय ८५ रनले हराएको छ ।
जारी प्रतियोगितामा कुनै पनि टोलीले रनका आधारमा हासिल गरेको यो सबैभन्दा ठूलोअन्तरको जित पनि हो । मंगलबार नै बागमती प्रदेशले गण्डकी प्रदेशलाई एक सय ७० रनले हराएको थियो ।
जारी प्रतियोगितामा पुलिस क्लब र एपीएफ क्लब दुवैले आफ्नो दोस्रो खेल खेलेका हुन् । आफ्नो पहिलो खेलमा एपीएफ क्लब विजयी भएको थियो भने पुलिस क्लब पराजित ।
एपीएफ क्लबले पहिलो खेलमा बागमती प्रदेशलाई ७१ रनले हराएको थियो । पुलिस क्लब भने आफ्नो पहिलो खेलमा त्रिभुवन आर्मी क्लबसँग २२ रनले पराजित भएको थियो ।
मूलपानी क्रिकेट मैदानमा मंगलबार टस हारेर पहिले ब्याटिङको निम्तो पाएको पुलिस क्लबले निर्धारित ओभरमा नौ विकेट गुमाएर तीन सय ५५ रन बनाएको थियो । प्रधानमन्त्री कप क्रिकेटको इतिहासमै बनेको यो सबैभन्दा ठूलो स्कोर हो ।
विशाल लक्ष्य पछ्याउँदै जवाफी ब्याटिङमा ओर्लिएको एपीएफ क्लबले भने ४४ ओभरमै अलआउट हुनुअघि एक सय ७० रनमात्र बनाउन सक्यो ।
पुलिस क्लबका चार ब्याट्सम्यानले अर्धशतक बनाए । ओपनर दिनेश खरेलले ६० रनको योगदान गरे । उनले केवल ५२ बलमा चार छक्का र ६ चौका प्रहार गरे ।
शंकर रानाले पनि टोलीका लागि ६१ रनको योगदान गरे । पाँचौं नम्बरमा क्रिज समाल्न आएका उनले केवल ५४ बलको सामना गरी चार छक्का र पाँच चौका हिर्काए ।
कप्तान आरिफ शेखले पनि टोलीका लागि ५० रनको योगदान गरे । छैटौं नम्बरमा ब्याटिङ गर्न आएका उनले ४२ बलमा दुई छक्का र पाँच चौका प्रहार गरे ।
यसैगरी, विकेटकिपर ब्याट्सम्यान दिलसाद अलीले पनि टोलीको खातामा अविजित ५१ रन थपे । आठौँ नम्बरमा क्रिज समाल्न आएका उनले केवल ३० बलमा तीन छक्का र पाँच चौका हिर्काए ।
रासिद खानले टोलीको खातामा ४४ रन थपे । उनले ४२ बलमा तीन छक्का र तीन चौका हिर्काए । अमित श्रेष्ठले पनि ३९ बलमा दुई छक्का र पाँच चौकाको मद्दतले ३९ रन जोडे ।
पुलिस क्लबले अतिरिक्त रुपमा १७ रन पायो । एपीएफ क्लबका बलर कमल ऐरी र अमर रौतेलाले दुई/दुई तथा नन्दन यादव, रोहित पौडेल र युवराज खत्रीले एक/एक विकेट लिए ।
जवाफी ब्याटिङ गरेको एपीएफ क्लबका लागि भने तल्लोक्रमका ब्याट्सम्यान नन्दन यादवले अविजित ४४ रन बनाए । कमल ऐरीले पनि ३५ रन जोडे । सन्दीप जोराले २४ र पूर्ण बीकेले २० रन बटुले ।
पुलिस क्लबका बलर ललित राजवंशीले तीन विकेट लिए । दिनेश खरेल, करण केसी र रासिद खानले दुई/दुई विकेट हात पारे । सागर ढकालले पनि एक/एक विकेट लिए ।
