राष्ट्रिय प्रजातन्त्र पार्टी (राप्रपा) भित्रको विवाद उत्कर्षमा पुगेको छ ।

पार्टी महामन्त्री धवलशमशेर राणा समूहले अध्यक्ष राजेन्द्र लिङ्देनलाई घुमाउरो भाषामा पार्टी अध्यक्षबाट राजीनामा दिएर महाधिवेशन गर्नका लागि निष्पक्ष व्यक्तिको संयोजकत्वमा महाधिवेशन आयोजक समिति गठन गर्न माग गरेको छ ।

महामन्त्री राणासहितका नेताहरूले आइतबार दिउँसो विज्ञप्ति जारी गर्दै निर्वाचनको नतिजाका विषयमा प्रश्न उठाएका छन् ।

यस्तै, पार्टीसँग सल्लाह नै नगरी उपसभामुख पदमा उम्मेदवारी दर्ता गरिएको भन्दै उनीहरूले आपत्ति जनाएका छन् ।

‘मध्यावधि निर्वाचनको आलो घाउमा उपसभामुखको निर्वाचन त झन् नूनचूक दलेसरह भयो । उपसभामुख पदमा उम्मेदवारी दिएबाट राप्रपामाथि निष्ठा र सैद्धान्तिक आधारमा प्रश्न मात्र उठेन, निर्वाचनको सो विषय केन्द्रीय कार्यसमिति/कार्यसम्पादन समितिमा छलफलसमेत नहुँदा, विधि पद्धति, प्रजातान्त्रिक अनुशासन र जिम्मेवारीबाट पार्टी र नेतृत्व पूर्ण चुकेको निष्कर्ष प्रवाह भयो‚’ विज्ञप्तिमा लेखिएको छ‚ ‘त्यसैले सच्चिने कि सकिने भन्ने गम्भीर अवस्थाबीच, केन्द्रीय महाधिवेशनबाट ताजा जनादेश प्राप्त गर्नुबाहेक उत्तम विकल्प राप्रपासँग छैन ।’