नेपाली कांग्रेसका महामन्त्री प्रदीप पौडेलले पार्टीको आधिकारिकता सम्बन्धमा शुक्रबार सर्वोच्च अदालतले गरेको फैसलाको स्वागत गरेका छन् ।

पौडेलले शुक्रबार राति वक्तव्यमार्फत उक्त फैसलालाई कसैका लागि पनि हार वा जितको विषय नबनाउन आग्रह गरेका छन्।

उनले एक पक्षको जीत र अर्को पक्षको हारका रूपमा व्याख्या गरिए पार्टी एकता खल्बलिन सक्ने भन्दै त्यसप्रति सचेत रहन सबैलाई अपिल गरेका छन्।

सबै चारतारे झण्डामुनि गोलबद्ध हुनुपर्ने उनको भनाइ छ ।

'सबैलाई सुरक्षित आभास हुने गरी पुनः चारतारे झण्डामुनि गोलबद्ध हुनुपर्छ,' उनले भनेका छन्।

महामन्त्री पौडेलले आगामी १५औं महाधिवेशनलाई केन्द्रमा राख्दै सम्पूर्ण नेता, कार्यकर्ता र शुभेच्छुकलाई एकताबद्ध भएर अघि बढ्न आह्वान गरेका छन्।

सर्वोच्चले शुक्रबार पूर्व सभापति शेरबहादुर देउवासहितको रिटलाई खारेज गर्दै गगन पक्षलाई आधिकारिकता दिएको छ ।