नेपाली कांग्रेसको देउवा समूहले भोलि आइतबार १४ औं महाधिवेशनमा निर्वाचित पदाधिकारीसँग छलफल गर्ने भएको छ ।

शनिबार काठमाडौं उपलब्ध शीर्ष नेताहरूसँग छलफल गरेको यो समूहले आइतबार उपत्यकामा उपलब्ध १४ औं महाधिवेशनमा निर्वाचित पदाधिकारी र पूर्व केन्द्रीय सदस्यसँग छलफल गर्न लागेको हो ।

छलफलको अगुवाइ पूर्व कार्यवाहक सभापति पूर्णबहादुर खड्काले गरिरहेका छन् । शनिबारको छलफल उनकै निवासमा भएको थियो ।

आइतबार भने धुम्बाराहीस्थित स्मार्ट होटलमा दिउँसो १२ बजेका लागि छलफल तय भएको खड्काको सचिवालयले जनाएको छ । 

शनिबारको छलफलमा यो समूहले अदालतको फैसला मानेर अघि बढ्ने र पार्टीभित्रको राजनीतिक लडाइँ जारी राख्ने निष्कर्ष निकालेको छ । 

‘फैसलामा असन्तुष्टिका पर्याप्त आधार हुँदाहुँदै पनि, फैसलाले आधार मानेका विभिन्न विषयहरू विरोधाभासपूर्ण र विवादास्पद हुँदा हुँदै पनि त्यो फैसलालाई स्वीकार गर्ने कुरा आज छलफल भएको छ’, छलफलपछि नेता मीन विश्वकर्माले भने, ‘हिजोदेखि उहाँ (पूर्णबहादुर खड्का) निवर्तमान कार्यवाहक सभापति हुनुभयो । त्यसलाई हामीले स्वीकार गरेका छौं । अब कानूनी विषय टुंगियो । वैधानिकताको विषय टुंगियो । तर अब राजनीतिक विषय भनेको पार्टी एकताको विषय हो । त्यसैले पार्टी एकताका विषयमा निरन्तर चिन्ता भइराखेको छ । अदालतको फैसला मानेर अघि बढ्छौं ।’

 विश्वकर्माले अब पार्टीलाई मिलाएर लैजाने सम्पूर्ण जिम्मेवारी सभापति गगन थापाको काँधमा रहेको बताएका छन् ।