नेपाली कांग्रेसका निवर्तमान कार्यवाहक सभापति पूर्णबहादुर खड्काले विशेष महाधिवेशन नै चुनावमा पार्टी पराजयको मुख्य कारण भएको दाबी गरेका छन् ।

कांग्रेस विभाजित मनस्थितिमा हुँदा रास्वपाले भारी बहुमत ल्याएको उनको विश्लेषण छ ।

सर्वोच्च अदालतले विशेष महाधिवेशनबाट निर्वाचित पदाधिकारीलाई मान्यता दिएपछि आफ्नो समूहको धारणा बनाउन जिल्ला सभापतिसहितको भेलामा खड्काले चुनावमा हारको कारण विशेष महाधिवेशन रहेको दोहोर्‍याएका हुन् । 'चुनावमा पार्टी पराजयको मुख्य कारण विशेष महाधिवेशन नै हो, त्यो नभएको भए कांग्रेसले ६० देखि ७० सिट सजिलै जित्थ्यो,' खड्काले भने, 'साथीहरूले पद त पाउनु भयो, तर पार्टीलाई यो हालतमा पुर्‍याउनु भयो ।'

खड्काले रास्वपालाई जिताउनकै लागि कांग्रेसमा भाँडभैलो सृजना गरिएको हुनसक्ने दाबी गरे ।

खड्काले बोलेपछि मंगलबार जिल्ला सभापतिहरूले बोल्न थालेका छन् । स्याङजाका जिल्ला सभापति राजु थापाले पार्टीलाई दह्रो बनाएर लैजाने काम नयाँ नेतृत्वको रहेको बताए ।

ओखलढुङ्गाका जिल्ला सभापति तेजेन्द्र खनालले पार्टीभित्रको विवादकै कारण चुनावमा पराजय व्यहोर्नु परेको बताए । उनले पनि नयाँ नेतृत्वले सबैलाई समेटेर लैजानुपर्ने धारणा राखे ।

महोत्तरीका जिल्ला सभापति नागेश्वर यादवले विशेष महाधिवेशनको विरोध गरेकै नेता टिकट लिएर चुनाव लड्न गएपछि कार्यकर्तामा अन्योल भएको बताए ।

उनले १५औं महाधिवेशनमा देउवा समूहबाट साझा उम्मेदवार तय गरेर जान सुझाव दिए ।

जिल्ला सभापतिहरूले अहिले पनि देशभर विशेष महाधिवेशन पक्षधर नेताहरूको बाहुल्यता रहेकोले एकजुट भएर गएमा १५औं महाधिवेशनमा आफूहरूको विचार समूहले चुनाव जित्ने दाबी गरेका थिए ।

जिल्ला सभापतिहरूको कुरा सुनेपछि भोलि आफूहरूको धारणा बन्ने नेता रामहरि खतिवडाले जानकारी दिए ।

मंगलबारको भेलामा विजयकुमार गच्छदार, विमलेन्द्र निधि, शशांक कोइराला र सुजाता कोइराला उपस्थित थिए । शेखर कोइराला भने अनुपस्थित थिए ।