नारायणघाट–बुटवल सडक योजनाअन्तर्गत दाउन्ने खण्डमा एकतर्फी ढलानको काम सम्पन्न भएको छ । आयोजनाले यसअघि गरेको प्रतिबद्धताअनुसार अप्रिल महिनाभित्रै दाउन्नेको पूर्वी खण्ड एकातर्फी रूपमा ढलान सडक जोडिएको हो ।

अब करिब १४ दिनपछि नारायणघाटदेखि दाउन्नेसम्मको करिब ६५ किलोमिटर यात्रा पूर्ण रूपमा पक्की सडकबाट गर्न सकिने आयोजनाले जनाएको छ ।

चितवनको गैँडाकोटदेखि बुटवल राजमार्ग चौराहासम्म ११३ किलोमिटर सडक विस्तार भइरहेको छ। यसमध्ये दुम्किबासदेखि बर्दघाटसम्मको १४ किलोमिटर दाउन्ने खण्ड भौगोलिक रूपमा अत्यन्त जटिल तथा पहिरोको जोखिमयुक्त क्षेत्र मानिन्छ ।

साँघुरो र उकालो रहेको दाउन्ने खण्ड निर्माणाधीन हुँदा सवारी जाम र आवागमन अस्तव्यस्त हुने समस्या देखिँदै आएको थियो । एकातर्फी ढलान सम्पन्न भएसँगै यो समस्या केही हदसम्म कम हुने अपेक्षा गरिएको छ।