०५ साउन २०८३, मंगलबार
आईसीसी क्रिकेट विश्वकप लिग–२ को आगामी शृंखलाका लागि खेलिएको अभ्यास खेलमा शनिबार स्कटल्यान्डले नेपाल ‘ए’ टोलीलाई जितका लागि तीन सय तीन रनको लक्ष्य दिएको छ ।
मूलपानी क्रिकेट मैदानमा जारी खेलमा टस जितेर पहिले ब्याटिङ गरेको स्कटल्यान्डले निर्धारित ओभरमा आठ विकेट गुमाएर तीन सय दुई रन बनाएको हो ।
स्कटल्यान्डका लागि ओपनर ब्याट्सम्यान जर्ज मुन्सीले ६२ रनको योगदान गरे । उनले केवल ५१ बलको सामना गरी तीन छक्का र ६ चौका हिर्काए ।
माइकल इङ्लिसले पनि अर्धशतकीय पाली खेले । पाँचौँ नम्बरमा क्रिज समाल्न आएका उनले ५६ बलमा ३ छक्काको मद्दतले अविजित ५६ रन जोडेका हुन् ।
अर्का ओपनर फिनले म्याक्रेथले पनि ३० रन बनाए । तेस्रो नम्बरमा क्रिज समाल्न आएका ब्राडन म्याकमुलेनले टोलीको खातामा ३९ रन थपे ।
रिची बेरिङ्टनले पनि ४० रनको योगदान गरे । छैटौँ नम्बरका ब्याट्सम्यान म्याथ्यू क्रसले पनि २५ रन बटुले । ज्याक जार्भिसले ३० रन बनाए ।
नेपाली टोलीका बलर आकाश चन्दले तीन विकेट लिए । शेर मल्ल, विपिन खत्री, पवन सर्राफ र कुशल मल्लले पनि एक/एक विकेट हात पारे ।
नेपाल ‘ए’ टोलीले यसअघि दुई खेलमा आफूभन्दा बलिया टोलीलाई हराइसकेको छ । नेपाल ‘ए’ले बिहीबार खेलिएको खेलमा स्कटल्यान्डलाई ४५ रनले हराएको थियो ।
यसैगरी, शुक्रबार मूलपानी क्रिकेट मैदानमा खेलिएको खेलमा नेपाल ‘ए’ टोलीले अमेरिकालाई पनि तीन विकेटले हराएको थियो ।
नेपालको सिनियर टोलीले अर्को साता स्कटल्यान्ड र अमेरिकासँग घरेलु मैदानमा लिग–२ शृंखला खेल्दैछ ।
