नेकपा एमाले संसदीय दलका नेता रामबहादुर थापा ‘बादल’ले सरकारको नेतृत्वकर्ता दल रास्वपालाई अराजक जमातको अस्थायी गठजोड भएको टिप्पणी गरेका छन् ।

मंगलबार प्रतिनिधिसभा बैठकमा सरकारका नीति तथा कार्यक्रममाथिको छलफलमा भाग लिँदै थापाले रास्वपाको उदय अस्वाभाविक भएको आरोप लगाएका हुन् ।

‘रास्वपा राजनीतिक नेतृत्वको दृष्टिकोणले सुसंगत वैज्ञानिक विचारधारामा आधारित दल होइन । यो आकस्मिक, अप्रत्याशित रूपमा उत्पन्न भएको अति महत्त्वाकाङ्क्षी अराजक जमातको अस्थायी गठजोड हो’, बादलले भने, ‘दार्शनिक रूपमा सारसंग्रहवाद र राजनीतिक रूपमा लोकप्रियतावादको दलदली जगमा अडेको छ ।’

लोकप्रियतावादी दल रूपमा अत्यन्त प्रिय देखिए पनि सार र परिणाममा घातक हुने बादलले टिप्पणी गरे । बादलले बोल्दा बोल्दै रास्वपा सांसद मनिष खनालले नियमापत्ति गरेका थिए । 

बादलले भने रास्वपाले प्रशासन र न्यायतन्त्रमा एकल प्रभुत्व कायम गर्नका लागि संसद् स्थगित गरेर अध्यादेश ल्याएको आरोप लगाए । 

‘न्यायालयपछि आगामी दिनमा स्थानीय, प्रदेश र राष्ट्रियसभामा प्रभुत्व कायम गरेपछि कथित नीला क्रान्तिले पूर्णता गर्न सक्दछ’, उनले भने ।