२८ असार २०८३, आइतबार
चिलीका विदेश मन्त्री फ्रान्सिस्को पेरेज म्याकेन्ना व्यापार, व्यवसाय, प्रविधि र लगानीका क्षेत्रमा द्विपक्षीय सहयोग सुदृढ बनाउने उद्देश्यले भारतको औपचारिक भ्रमणमा आइपुगेका छन् । दुई देशबीचको आर्थिक र रणनीतिक सम्बन्धलाई नयाँ उचाइमा पुर्याउन यो भ्रमणलाई महत्त्वपूर्ण मानिएको छ।
भ्रमणका क्रममा चिलीका विदेश मन्त्रीले भारतीय समकक्षी एस जयशंकर र वाणिज्य तथा उद्योग मन्त्री पीयूष गोयलसँग उच्चस्तरीय भेटवार्ता गर्ने कार्यक्रम रहेको भारतीय सञ्चार माध्यमहरूले जनाएका छन् । ती बैठकहरूमा विशेष गरी व्यापारिक बाधाहरू हटाउने र प्रविधि हस्तान्तरणका सम्भावित क्षेत्रहरूबारे छलफल हुनेछ।
आफ्नो भ्रमणका क्रममा मन्त्री म्याकेन्नाले नयाँ दिल्लीमा आयोजना हुने 'सीआईआई वार्षिक व्यापार शिखर सम्मेलन २०२६' मा पनि सहभागिता जनाउने छन् । यसका साथै उहाँले विभिन्न व्यावसायिक कार्यक्रमहरूमा सहभागी भई भारतीय लगानीकर्तालाई चिलीमा रहेका अवसरहरूबारे जानकारी गराउने छन् ।
दक्षिण अमेरिकी मुलुक चिलीसँग भारतले आफ्नो व्यापारिक सम्बन्ध विस्तार गरिरहेको सन्दर्भमा यो भ्रमणले दुवै देशका उद्योगी र व्यवसायीहरूका लागि सहकार्यको नयाँ ढोका खोल्ने अपेक्षा गरिएको छ।
