पश्चिम एसियामा जारी भीषण युद्ध र बढ्दो तनावका बीच करिब २० हजार टन खाना पकाउने ग्यास बोकेको ट्याङ्कर भारतको गुजरातस्थित कान्डला बन्दरगाहमा आइपुगेको छ।

मार्शल टापुको ध्वजाबाहक उक्त एलपीजी ट्याङ्करले अत्यन्त संवेदनशील मानिने हर्मुज जलडमरुमध्य पार गर्दै सुरक्षित रूपमा यात्रा पूरा गरेको हो। भारतीय आयल कर्पोरेसन (आईओसी) ले कतारको रास लाफान टर्मिनलबाट ग्यास खरिद गरेको बताइएको छ।

युद्धका कारण इरान र आसपासका क्षेत्रमा तनाव बढेसँगै हर्मुजबाट हुने ऊर्जा आपूर्तिमा अवरोधको जोखिम बढेको छ। विश्वको करिब २० प्रतिशत इन्धन तथा ऊर्जा आपूर्ति यही मार्ग हुँदै हुने भएकाले हालको परिस्थितिले आपूर्ति शृङ्खलामा दबाब सिर्जना गरेको छ।

सुरक्षा जोखिमका बीच यात्रा गरेको ट्याङ्करका चालक दलका सदस्यले यात्रा निकै चुनौतीपूर्ण रहेको बताएका छन्। इरानी नौसेनाको निगरानी, सम्भावित आक्रमणको जोखिम र सैन्य तनावका बीच जहाजले सावधानीपूर्वक मार्ग पार गरेको जनाइएको छ।

स्रोतका अनुसार जहाजको स्वचालित पहिचान प्रणाली (एआईएस) सुरक्षा कारणले केही समयका लागि बन्द गरिएको थियो। ओमानको खाडी हुँदै अघि बढेको जहाज लाराक टापु नजिकको संवेदनशील क्षेत्र पार गर्दै भारततर्फ सुरक्षित रूपमा प्रवेश गरेको बताइएको छ।

मार्च महिनाको सुरुदेखि हर्मुज मार्ग हुँदै भारत पुग्ने यो १३ औँ एलपीजी ट्याङ्कर भएको जनाइएको छ। यसअघि पनि विभिन्न ग्यास तथा इन्धन बोकेका जहाजहरू यही मार्ग हुँदै भारत भित्रिएका थिए।

यसैबीच भियतनामको अर्को ट्याङ्कर ‘एनभी सनशाइन’ पनि सोही मार्ग हुँदै भारततर्फ अघि बढिरहेको र न्यू मङ्गलोर बन्दरगाहमा पुग्ने तयारीमा रहेको बताइएको छ।

विश्लेषकका अनुसार मध्यपूर्वमा जारी तनावले भारतको ऊर्जा भण्डारमा पनि दबाब पारेको छ। देशको रणनीतिक कच्चा तेल भण्डार करिब १५ प्रतिशतले घटेको तथ्याङ्क सार्वजनिक भएको छ।

ऊर्जा आपूर्तिमा जोखिम बढेसँगै भारत सरकारले इन्धनको विवेकपूर्ण प्रयोग र बचतमा जोड दिइरहेको छ। पछिल्ला दिनमा प्रधानमन्त्रीले समेत पेट्रोल र डिजेलको मितव्ययी प्रयोग गर्न अपिल गरेका छन्।

विशेषज्ञहरूका अनुसार यदि मध्यपूर्वको अवस्था थप बिग्रिए ऊर्जा आपूर्ति शृङ्खला अझ चुनौतीपूर्ण बन्न सक्ने देखिन्छ।