श्रीमानसँगको घरायसी झगडापछि माइती जान्छु भनेर हिँडेकी बाजुराकी एक महिला मृत फेला परेकी छन् ।

जगन्नाथ गाउँपालिका-५ गोत्रीकी ३५ वर्षीया लालचुला बुढा शाही मृत फेला परेकी हुन् । उनको शव कालीकोटको सान्नी त्रिवेणी गाउँपालिका-२ आमतडास्थित कर्णाली नदीको किनारमा फेला परेको जिल्ला प्रहरी कार्यालय बाजुराका सूचना अधिकारी, प्रहरी निरीक्षक नरेशबहादुर शाहीले जानकारी दिए ।

उनी गत वैशाख २७ गते श्रीमान सकस बहादुर शाहीसँगको घरायसी झगडापछि माइती जाने भनेर घरबाट निस्किएकी थिइन् । तर उनी माइती पनि नपुगेको र आफन्त, छरछिमेकमा समेत फेला नपरेपछि दाजु  नरबहादुर बुढाले प्रहरी चौकी जुड्डी बाजुरामा खोजतलासका लागि निवेदन दिएका थिए ।

प्रहरी समेतको सहयोगमा खोजतलास गर्ने क्रममा मंगलबार बिहान ९:३५ बजेको समयमा उनको शव नदी किनारमा फेला परेको हो ।

थप अनुसन्धानका लागि घटनास्थलमा कालीकोटबाट प्रहरी टोली खटिएको र आफन्त समेत घटनास्थलमा पुगिसकेका प्रहरीले जनाएको छ ।