उत्तरी चीनमा कोइला खानी विस्फोट हुँदा कम्तिमा ८२ जनाको मृत्यु भएको छ । नौ जना अझै बेपत्ता रहेको देशको राज्य मिडियाले रिपोर्ट गरेको छ। 'शान्सी प्रान्तको टोङ्झाउ समूहको लिउशेन्यु कोइला खानीमा भएको ग्यास विस्फोटमा ८२ जनाको मृत्यु भएको छ,' समाचार एजेन्सी सिन्ह्वाले भनेको छ । 

विस्फोट शुक्रबार स्थानीय समय अनुसार १९:२९ बजे भएको थियो, घटनाको समयमा २४७ जना कामदार ड्युटीमा रहेको बताइएको छ। घटनास्थलमा उद्धार कार्य भइरहेको छ।

२००० को दशकको शुरूमा चीनको कोइला खानी उद्योगमा घातक दुर्घटनाहरू सामान्य थिए, तर हालका वर्षहरूमा, सुरक्षा मापदण्डहरू कडा पारिएको छ ।

चीनको आपतकालीन व्यवस्थापन मन्त्रालयले सञ्चालनमा मद्दत गर्न उद्धार टोलीका ३४५ कर्मचारीहरू पठाएको बताएको छ ।

राज्य सञ्चालित सञ्चारमाध्यमको फुटेजमा घटना भएको ठाउँमा ठूलो संख्यामा उद्धारकर्ताहरू, प्यारामेडिक्स सहितका उद्धारकर्मीहरू आइपुगेको देखिन्छ।