२० असार २०८३, शनिबार
नेकपा एमालेले पार्टीको आगामी कार्यदिशा र संगठनात्मक संरचनालाई व्यवस्थित गर्ने निर्णय गरेको छ । आइतबार भक्तपुरको गुण्डुस्थित पार्टी अध्यक्ष केपी शर्मा ओलीको निवासमा झण्डै साढे ९ घण्टासम्म चलेको बैठकले पार्टीको आगामी कार्यदिशा र संगठनात्मक संरचनालाई व्यवस्थित गर्ने निर्णय गरेको उपमहासचिव लेखराज भट्टले जानकारी दिए ।
बैठकले पार्टीका पदाधिकारीहरूको वरीयता क्रम निर्धारण गरेको छ । जसमा अध्यक्ष ओली पहिलो नम्बरमा रहेका छन् भने उपाध्यक्ष रामबहादुर थापा ‘बादल’ दोस्रो र विष्णु पौडेल तेस्रो वरीयतामा छन् ।
यसैगरी उपाध्यक्षहरू पृथ्वीसुब्बा गुरुङ, गोकर्ण विष्ट, र रघुजी पन्त क्रमशः वरीयतामा रहेका छन् । त्यसैगरी महासचिवमा शंकर पोखरेल र उपमहासचिवहरूमा लेखराज भट्ट, योगेश भट्टराई र पदमा अर्यालको वरीयता तोकिएको छ । यस्तै सचिवमा महेश बस्नेतको वरीयता अन्तिममा रहेको छ ।
संगठनात्मक सुदृढीकरणका लागि पार्टी सदस्यता नवीकरणको प्रक्रियालाई पूर्ण रूपमा डिजिटल बनाउने समेत बैठकले निर्णय गरेको छ । जेठ मसान्तभित्र संगठनात्मक सदस्यता नवीकरण सम्पन्न गर्ने लक्ष्य राखिएको छ भने तोकिएको समयमा नवीकरण नगर्नेहरूको म्याद थप नगर्ने नीति लिइएको भट्टले बताए ।
यसका साथै, केन्द्रीय कमिटीका सदस्यहरूको कार्यविभाजनलाई पनि बैठकले अन्तिम रूप दिएको छ । जसमा नेताहरूलाई भूगोल र विभिन्न विभागहरूको जिम्मेवारी सुम्पिएको भट्टको भनाइ छ ।
बैठकले दुईवटा कार्यदलहरू पनि गठन गरेको छ । संविधान संशोधनका सन्दर्भमा सुझाव दिन उपाध्यक्ष विष्णु पौडेलको संयोजकत्वमा 'संविधान संशोधन सुझाव कार्यदल' र गत निर्वाचनको परिणामको समीक्षा गर्न उपाध्यक्ष रामबहादुर थापा 'बादल' को संयोजकत्वमा 'निर्वाचन समीक्षा प्रतिवेदन तयारी कार्यदल' गठन गरिएको छ । निर्वाचन समीक्षा कार्यदललाई एक महिनाभित्र रिपोर्ट बुझाउन समय दिइएको छ ।
पार्टी कार्यालय निर्माणको विषयमा पनि बैठकले निर्णय गरेको छ । २०७२ सालको भूकम्पपछि क्षतिग्रस्त भएको बल्खुस्थित मदननगरको आफ्नै जग्गामा पार्टी कार्यालयको नयाँ भवन निर्माण गर्ने प्रक्रिया अगाडि बढाउने निर्णय भएको छ । यसअघि कीर्तिपुरमा भवन निर्माण गर्ने प्रस्ताव गर्ने व्यवसायी मीनबहादुर गुरुङको प्रस्तावलाई धन्यवादसहित फिर्ता गर्दै आफ्नै जग्गामा भवन बनाउने निष्कर्षमा पार्टी पुगेको हो । नयाँ भवन नबनुन्जेल उपयुक्त ठाउँमा भाडामा कार्यालय सञ्चालन गरिने भट्टले बताए ।
पछिल्लो समय अध्यक्ष केपी शर्मा ओली पार्टीभित्र अल्पमतमा परेको र उनको राजीनामा मागिएको भनी बाहिर आएका हल्लाहरूलाई बैठकले पूर्ण रूपमा खारेज गरेको सचिव महेश बस्नेतले दाबी गरे ।
पार्टीभित्र लोकतान्त्रिक ढंगले बहस र छलफल हुनु स्वभाविक भएको तर अध्यक्षको नेतृत्वमा पार्टी एकढिक्का रहेको उनको दाबी थियो । कबस्नेतले पूर्व राष्ट्रपति विद्यादेवी भण्डारीको पार्टी सदस्यताको सन्दर्भमा पनि विगतको निर्णय अनुसार नै उनको सदस्यता कायम रहने गरी अगाडि बढ्ने जानकारी दिए ।
बैठकको अन्त्य गर्नुअघि अध्यक्ष ओलीले आफ्नो स्वास्थ्य अवस्था ९८ प्रतिशत ठीक भइसकेको जानकारी दिँदै अब आफू सातै प्रदेश र विभिन्न जिल्लाहरूमा पुगेर कार्यकर्ताको उत्साह जगाउन सक्रिय हुने बताएका थिए । बैठकमा उनले आगामी असार १५ देखि २० गतेभित्र पार्टीको केन्द्रीय कमिटी बैठक बस्ने जानकारी समेत गराएका थिए ।
बैठकले वर्तमान सरकारका कामकारबाहीको आलोचना गर्दै विभिन्न राजनीतिक र सामाजिक मुद्दाहरूमा आफ्नो धारणा सार्वजनिक गरेको छ । सरकारले प्रतिशोधी र पूर्वाग्रही व्यवहार देखाएको, संसद् बैठक हठात् स्थगित गरेर अध्यादेशमार्फत शासन चलाउन खोजेको, र सुकुम्बासीहरूलाई अमानवीय ढंगले विस्थापन गरेको भन्दै एमालेले विरोध जनाएको छ ।
यस्तै, प्रधानन्यायाधीश नियुक्तिमा वरीयता मिचिएको, महँगी बढेको र दलित तथा महिलामाथि हिंसा बढ्दा पनि सरकार मौन रहेको भन्दै एमालेले सदन र सडक दुवै ठाउँबाट भण्डाफोर अभियान चलाउने निर्णय गरेको भट्टले बताए ।
यसैबिच एमालेले राष्ट्रियता, लोकतन्त्र र विधिको शासनका लागि आवश्यकता अनुसार नेपाली कांग्रेस, माओवादी केन्द्र लगायतका दलहरूसँग पनि सहकार्य गर्न सक्ने ढोका खुल्ला राखेको बस्नेतले बताए ।
