लामो समयदेखि भन्सार र राजश्व नतिरेरै भेपको अवैध व्यापार गर्दै आएका ललितपुरको महालक्ष्मी नगरपालिका–८ का नविन खड्कालाई प्रहरीले नियन्त्रणमा लिएको छ । नेपालमा भेपको व्यापार प्रतिबन्ध छ । तर, खड्काले निर्बाध रूपमा भेपको अवैध कारोबार गर्दै आएको प्रहरीले जनाएको छ । 

खड्काले काठमाडौंको खिचापोखरीस्थित आरबी कम्प्लेक्सको अण्डरग्राउण्डमा स्माइल योर च्वाईस नामक पसल सञ्चालन गर्दै आएका थिए । उनले गोदामको रूपमा कम्प्लेक्सकै अर्को भवनमा दुई वटा कोठा प्रयोग गर्दै आएका थिए । 

काठमाडौं उपत्यका अपराध अनुसन्धान कार्यालयका प्रमुख एवं प्रहरी वरिष्ठ उपरीक्षक सन्तोष खड्काका अनुसार व्यापारी खड्काले बिलबिजकबिनै अवैध रूपमा भेपको कारोबार गर्दै आएको सूचना पाएपछि प्रहरीले खानतलासी गरेको थियो । 

खानतलासीका क्रममा कोठामा स्टोर गरि राखिएको २८ हजार पाँच सय पिस भेप भेटिएको थियो । उक्त भेपको मूल्य अहिले करिब ६ करोड रुपैयाँ रहेको प्रहरी दाबी छ ।

‘नेपालमा भेपको कारोबार अवैध छ, खड्काले अवैध रूपमा भेपको कारोबार गरिरहेको सूचना पायौँ, छापा मार्दा करोडौँको भेप बरामद भयो,’ एसएसपी खड्काले लोकान्तरसँग भने, ‘अब बरामद गरिएको भेप र पक्राउ परेका खड्कालाई राजश्व अनुसन्धान कार्यालय वा भन्सार विभागमध्ये एउटा निकायमा बुझाउने तयारीमा छौँ ।’