सरकारी सेवामा महिला कर्मचारीको संख्या ३० प्रतिशत पुगेको छ । २०६५ सालमा १२ प्रतिशतमा रहेको यो संख्या २०८२ फागुनमा ३० प्रतिशत पुगेको हो ।

बुधबार अर्थमन्त्रीले संसद्‌मा पेश गरेको आर्थिक सर्वेक्षणले सरकारी सेवामा महिला कर्मचारीको संख्या उल्लेख्य बढेको देखाएको हो । ‘सरकारी सेवामा महिला कर्मचारीको सङ्ख्या वृद्धि हुँदै गएको छ । २०६५ असारसम्म निजामती सेवामा महिलाको सङ्ख्या १२ प्रतिशत रहेकोमा २०८२ फागुनसम्म निजामती किताबखानामा दर्ता भएका तीन तहका सरकारी निकायमा कार्यरत महिला कर्मचारीको सङ्ख्या ३० प्रतिशत पुगेको छ,’ आर्थिक सर्वेक्षणमा भनिएको छ ।

यस्तै समावेशी व्यवस्था लागू भएपछि समावेशी विज्ञापनबाट २६ हजार बढी उम्मेदवार सरकारी सेवामा सिफारिश भएको सरकारको तथ्याङ्क छ । ‘समावेशी पदपूर्ति व्यवस्था लागू भएको आर्थिक वर्ष २०६४/६५ देखि २०८१/८२ सम्म विभिन्न समावेशी समूहको विज्ञापनबाट जम्मा २६ हजार २ सय ७४ जना उम्मेदवार सिफारिस भएका छन्,’ आर्थिक सर्वेक्षणमा भनिएको छ ।

सरकारले चालु आर्थिक वर्षको फागुनसम्म सङ्घीय सरकारका विभिन्न निकायको संगठन तथा व्यवस्थापन सर्वेक्षण सम्पन्न भई निजामती सेवा अन्तर्गतका विभिन्न सेवा, समूह र श्रेणीतर्फ ५० हजार ७ सय ६८ दरबन्दी कायम भएको जनाएको छ ।

यस्तो दरबन्दी सङ्ख्या २०८२ असारमा ५१ हजार ४ सय ५ रहेको थियो ।