२१ जेठ २०८३, बिहीबार
मलेसियामा जारी एसीसी महिला प्रिमियर कप क्रिकेट प्रतियोगितामा नेपालले लगातार दोस्रो जीत हासिल गरेको छ ।
बिहीबार बिहान खेलिएको आफ्नो दोस्रो खेलमा नेपालले भुटानलाई ५१ रनले हरायो । यसअघि, बुधबार खेलिएको आफ्नो पहिलो खेलमा नेपालले कतारलाई आठ विकेटले हराएको थियो ।
टस हारी पहिले ब्याटिङको निम्तो पाएको नेपाली टोलीले निर्धारित २० ओभरमा सबै विकेट गुमाएर एक सय १३ रन बनाएको थियो ।
जवाफी ब्याटिङमा ओर्लिएको भुटानको टोलीले भने निर्धारित २० ओभरमा आठ विकेट गुमाएर ६२ रनमात्र बनाउन सक्यो ।
भुटानलाई लक्ष्यसम्म पुग्न नदिन नेपाली टोलीका बलर रुविना क्षेत्रीले तीन र रिया शर्माले दुई विकेट लिए । कविता कुँवर र मनिषा उपाध्यायले पनि एक–एक विकेट हात पारे ।
भुटानका लागि ओपनर डेचेन वाङ्मोले सर्वाधिक अविजित ३९ रन बनाइन् । उनले जिम्मेवारीपूर्वक ब्याटिङ गर्दै ६० बलमा पाँच चौका पनि प्रहार गरिन् ।
त्यसअघि, नेपाली टोलीका माथिल्लो क्रमका कुनै पनि ब्याटरले गतिलो प्रदर्शन गर्न सकेनन् । छैटौँ नम्बरमा क्रिज समाल्न आएकी अनुभवी खेलाडी सीता राना मगरले सर्वाधिक ३७ रन बनाइन् ।
टोली अप्ठ्यारो स्थितिमा रहँदा उनले २८ बलमा ६ चौका पनि प्रहार गरिन् । नवौँ नम्बरकी ब्याटर रुविना क्षेत्रीले पनि २१ बलमा तीन चौकाको मद्दतले २४ रन जोडिन् ।
सानी पाख्रिनले २० बलमा दुई चौकाको मद्दतले १३ रन बटुलिन् । ओपनर सम्झना खड्काले ६ बलमा दुई चौकाको मद्दतले १० रन जोडिन् ।
नेपालका अन्य ब्याटरले दोहोरो अंकमा रन बनाउन सकेनन् । ओपनर विन्दू रावल खाता खोल्नुअघि नै पेभेलियन फर्किइन् ।
पूजा महतोले आठ र कप्तान ईन्दू वर्माले पाँच रन बनाए । रुवी पोद्दार एक र कविता कुँवर तीन रनमै आउट भए ।
रिया शर्मा र मनिषा उपाध्यायले खाता खोल्न पाएनन् । नेपाली टोलीले अतिरिक्त रूपमा पनि १२ रन पायो । भुटानका बलर सोनम छोदेन र छिरिङ जाङ्मोले तीन–तीन विकेट लिए ।
यो प्रतियोगिता निकट भविष्यमा आयोजना हुने एसीसी महिला टी–२० एसिया कपको छनोटको आधार पनि हो । प्रिमियर कपमा १८ टोलीको सहभागिता रहेको छ ।
प्रतियोगितामा सहभागी टोलीलाई चार समूहमा विभाजन गरिएको छ । नेपाल, भुटान, कतार र हङ्कङ समूह ‘डी’मा परेका छन् । समूह ‘सी’मा इन्डोनेसिया, कुवेत, मलेसिया र सिंगापुर रहेका छन् ।
यसैगरी, समूह ‘बी’मा चीन, ओमान, फिलिपिन्स, साउदी अरेबिया र संयुक्त अरब इमिरेट्स (यूएई) रहेका छन् । समूह ‘ए’मा बहराइन, जापान, मंगोलिया, म्यानमार र थाइल्यान्ड परेका छन् ।
नेपाली टोलीले समूहगत चरणको आफ्नो अन्तिम खेल जुन ६ तारिखमा हङ्कङसँग खेल्नेछ । प्रत्येक समूहबाट दुई–दुई टोली क्वार्टरफाइनलमा प्रवेश गर्नेछन् ।
यो प्रतियोगिताबाट चार टोली आगामी महिला एसिया कपमा छनोट हुनेछन् । त्यसैले आगामी एसिया कपमा छनोट हुन नेपालले कम्तिमा सेमिफाइनलसम्म पुग्नु आवश्यक छ ।
आफ्नो समूहमा लगातार दुई खेल जितेको नेपाल चार अंकसहित तालिकाको पहिलो स्थानमा छ । एक खेलबाट दुई अंक बटुलेको हङ्कङ दोस्रो स्थानमा आसिन छ । भुटान लगातार दुई खेलमा पराजित भएको छ भने कतारले पनि आफ्नो पहिलो खेल हारेको छ ।
