नेकपा (एमाले) ले पार्टीको आन्तरिक सुदृढीकरण र वर्तमान राजनीतिक परिस्थितिबारे विशेष कार्ययोजनासहित ‘अन्तरपार्टी निर्देशन–२’ जारी गरेको छ। 

पार्टी अध्यक्ष केपी शर्मा ओलीको अध्यक्षतामा बसेको सचिवालय बैठकका निर्णयहरू समेटेर जारी गरिएको उक्त निर्देशनमा पार्टीलाई जगैदेखि मजबुत बनाउन ‘मिसन पार्टी जागरण’ अभियान घोषणा गरिएको छ।

निर्देशनमार्फत एमालेले सातै प्रदेशका ७५३ वटै स्थानीय तहमा केन्द्रीय नेताहरूलाई जिम्मेवारी तोकेर कार्यविभाजन गरेको छ।

जसअन्तर्गत केन्द्रीय सदस्यहरूलाई विभिन्न पालिकाको इन्चार्ज र ‘मिसन पार्टी जागरण’ को प्रतिनिधि बनाएर पठाइएको छ। पार्टीले आगामी जेठ मसान्तभित्र संगठित सदस्यता नवीकरण गरिसक्न र नयाँ सदस्य विस्तारलाई तीव्रता दिन मातहतका कमिटीलाई निर्देशन दिएको छ।