ललितपुर २६ पुस– ललितपुरको गोदावरी नगरपालिका वडा नम्वर १२ ठेचो स्थित क्वे लाक्षी मन्दिरमा रहेको ब्रम्हायणी देवीको मुर्ति चौथो पटक चोरी भएको छ । उक्त मुर्तिलाई योमरी पुन्हीको जात्रामा खटमा (रथ) मा राखेर चापागाउँको बिभिन्न स्थान परिक्रमा गराईने प्रचलन रहेको छ ।

पौष १९ गते जात्रा सकेर राखिएको प्राचिन मुर्ति एकाएक गायव भएपछि स्थानीय तथा गुठीका नाइके समेत चिन्तित छन् । गुठिका पाला कृष्ण गोपाल मालीका अनुसार बिहान ५ बजे सरसफाई गर्न मुर्ति राखिएको कोठाको ढोका खोल्दा सो स्थान मा मुर्ति गायब भएको थियो । मालीका अनुसार २०७२ सालको भूकम्पले मन्दिर जिर्ण बनेपछि सो मन्दिरलाई नजिकै सारिएको थियो ।

सोहि स्थानबाट यसअघी पनि ३ पटक मुर्ति चोरी भईसकेको थियो । स्थानीय गुठीका नाइके तुलसी महर्जनका अनुसार पछिल्लो पटक २०४१ सालमा मुर्ति चोरी भएको थियो । ‘पछिल्लो पटक २०४१ सालमा चोरी भएको थियो, त्यस आगाडी चोरी हुँदा म सानै थिए मिति खास्सै याद भएन’ गुठी नाइके महर्जनले लोकन्तरसँग भने, ‘ ०४१ साल पहिले पनि २ पटक चोरी भएको थियो ।’ मुर्ति चोरीएपछि दुइ गाउँ र समुदायबीच झगडा हुने गरेको मन्दिरका पुजारीले बताए । 

ब्रम्हायणी देवीलाई नेवार समुदायमा ठूलो आस्थाको रुपमा मान्दै आएको पाईन्छ । डेढ फिट उचाईको पित्तलको मूर्तिमा सुनको जलप लगाइएको प्रहरीले जनाएको छ । महानगरीय प्रहरी बृत्त चापागाँउका प्रमुख प्रहरी नायव उपरीक्षक रवीन्द्र रेग्मीले चाडै नै मुर्ति चोरलाई समात्ने लोकान्तरलाई बताए ।