राष्ट्रिय स्वतन्त्र पार्टी (रास्वपा) का सांसद अमरेशकुमार सिंहले नेपालको लोकतन्त्र, सङ्घीयता र समावेशितामाथि कुनै पनि प्रकारको छेडखानी भए जनताले सशक्त प्रतिरोध गर्ने बताएका छन्।

बिहीबार सामाजिक सञ्जालमार्फत प्रतिक्रिया दिँदै उनले लोकतान्त्रिक व्यवस्था र सङ्घीय प्रणालीको पक्षमा आफ्नो धारणा राखेका हुन्।

'जगत जननी सीतामाताको भूमि जनकपुरधामबाट आज फेरि भन्दैछु, नेपालको लोकतन्त्र, सङ्घीयता र समावेशितासँग कसैले छेडखानी गर्छ भने नेपाली जनताले यसको सशक्त प्रतिरोध गर्नेछन्,' सिंहले उल्लेख गरेका छन्। उनले जनताले सुशासन र समृद्धिको अपेक्षा गरेको भन्दै आफूहरू हरेक कदममा जनताको पक्षमा रहने बताएका छन्।

रास्वपाको चितवनमा जारी महाधिवेशनमा पार्टीले संघीयताको विषयमा विवादास्पद प्रतिवेदन ल्याइएपछि अमरेशले यस्तो धारणा सार्वजनिक गरेका हुन् । 

महाधिवेशनको बन्दसत्रमा सभापति रवि लामिछाने र उपसभापति तथा अर्थमन्त्री डा. स्वर्णिम वाग्लेले छुट्टाछुट्टै प्रतिवेदन प्रस्तुत गरेका थिए ।  सभापति लामिछानेले प्रस्तुत गरेको ‘राजनीतिक प्रतिवेदन तथा प्रस्ताव’मा प्रदेश सभा र प्रदेश सरकारको पुनर्संरचनाको पक्षमा पार्टी रहेको उल्लेख छ।

त्यस्तै, डा. वाग्लेले प्रस्तुत गरेको ‘राष्ट्रिय स्वतन्त्र पार्टीको अर्थ–राजनीतिक प्रस्ताव’मा प्रदेश सभाको संरचनासहित सङ्घीय व्यवस्थाको पुनर्संरचना गर्नुपर्ने धारणा राखिएको छ।