०८ साउन २०८३, शुक्रबार
रुसले बिहीबार युक्रेनको राजधानी कीभसहित विभिन्न क्षेत्रमा मिसाइल र ड्रोनमार्फत भीषण हवाई आक्रमण गर्दा कम्तीमा १३ जनाको मृत्यु भएको छ भने ९० जनाभन्दा बढी घाइते भएका छन् । घाइतेमध्ये दुई जना बालबालिका रहेका छन् ।
आक्रमणका क्रममा मिसाइल र ड्रोनले आवासीय भवनमा प्रहार गरिएको छ । कीभमा एक नौतले आवासीय भवनको केही भाग भत्किएको छ ।
आक्रमणपछि सहरका २० भन्दा बढी स्थानमा क्षति पुगेको युक्रेनी अधिकारीहरूले जनाएका छन् । एम्बुलेन्स स्टेसन, एक वैज्ञानिक अनुसन्धान संस्था, होटल तथा विभिन्न व्यावसायिक भवनहरू पनि क्षतिग्रस्त भएका समाचार संस्था रोयटर्सले जनाएको छ ।
युक्रेनी राष्ट्रपति भोलोदिमिर जेलेन्स्कीले रुसले कुल ७४ वटा मिसाइल र ४९६ वटा ड्रोन प्रहार गरेको बताएका छन् । उनका अनुसार प्रहार गरिएका मिसाइलमध्ये झण्डै आधा ब्यालिस्टिक मिसाइल थिए भने आक्रमणमा जेट–सञ्चालित शाहेद ड्रोनसमेत प्रयोग गरिएको थियो ।
युक्रेनको वायुसेनाले ४८ वटा मिसाइल र ४७६ वटा ड्रोन निष्क्रिय पारे पनि २५ वटा ब्यालिस्टिक मिसाइल र १२ वटा ड्रोनले ३३ स्थानमा क्षति पुर्याएको जनाएको छ । कीभ नै आक्रमणको मुख्य लक्ष्य रहेको वायुसेनाको भनाइ छ ।
जेलेन्स्कीका अनुसार खार्किभ क्षेत्रमा एक बालबालिकासहित पाँच जनाको तथा कीभ क्षेत्रमा दुई जनाको मृत्यु भएको छ । आक्रमणबाट सुमी, ड्निप्रोपेत्रोभ्स्क, जापोरिझ्झिया र चेर्कासी क्षेत्रमा पनि क्षति पुगेको उनले बताएका छन् ।
उनले युक्रेनलाई थप हवाई प्रतिरक्षा प्रणाली उपलब्ध गराउनु अहिलेको सबैभन्दा महत्त्वपूर्ण आवश्यकता भएको उल्लेख गरेका छन् ।
यता, युक्रेनी सेनाले पनि रुसको निज्नी नोभगोरोड क्षेत्रस्थित क्स्तोभो शहरमा रहेको लुकोइल–निजेगोरोडनेफ्टेओर्गसिन्टेज तेल प्रशोधन केन्द्रमा राति आक्रमण गरेको जनाएको छ ।
प्रारम्भिक जानकारीअनुसार कच्चा तेल प्रशोधन गर्ने मुख्य एकाइमा प्रहार भएको छ भने क्षतिको विस्तृत विवरण संकलन भइरहेको युक्रेनी जनरल स्टाफले जनाएको छ ।
हालका साताहरूमा युक्रेनले रुसको भित्री क्षेत्रमा आक्रमण तीव्र बनाउँदै आएको छ । यसले विश्वकै तेस्रो ठूलो तेल उत्पादक रुसमा इन्धन आपूर्ति संकट निम्त्याएको र भारतजस्ता टाढाका देशबाट समेत पेट्रोल आयात गर्नुपर्ने अवस्था सिर्जना भएको अन्तर्राष्ट्रिय सञ्चारमाध्यमहरूले जनाएका छन् ।
