०६ साउन २०८३, बुधबार
अर्थमन्त्री डा. स्वर्णिम वाग्लेले विगतमा आफूविरुद्ध सम्पत्ति शुद्धीकरणको हतियार चलाउने कोसिस भएको दाबी संसद्मा गरेका छन् । अर्थमन्त्रीको दाबीप्रति नेकपा एमालेले आपत्ति जनाएको छ ।
बिहीबार प्रतिनिधिसभा बैठकमा सम्पत्ति शुद्धीकरण विधेयकमाथिको छलफलमा उठेका प्रश्नको जवाफ दिने क्रममा मन्त्री वाग्लेले विगतमा आफूलाई समेत सो हतियार प्रहार गर्न खोजिएको बताएका हुन् ।
‘विगतमा यसको व्यापक दुरुपयोग गरिएको थियो, हाम्रै पार्टीका सभापतिविरुद्ध यो हतियार चलाइएको थियो । मविरुद्ध पनि हतियार चलाउन खोजिएको कुरा अहिलेका कर्मचारीले बताएका छन्’, मन्त्री वाग्लेले भने ।
विगतमा फरक विचार राख्ने राजनीतिक दलमाथि सम्पत्ति शुद्धीकरणको हतियार चलाइएको वाग्लेले आरोप लगाए । ‘हामी त्यो गर्दैनौं, विगतमा जे गरिएको थियो । हाम्रो अर्जुनदृष्टि मुलुकलाई ग्रेलष्टिबाट निकाल्ने छ । त्यसका लागि जे जे गर्नुपर्छ गर्ने, जे जे गर्न हुँदैन नगर्ने’, वाग्लेले भने ।
अर्थमन्त्रीको भनाइप्रति नेकपा एमालेले भने संसद्मै आपत्ति जनाएको छ । एमाले सांसद गुरू बरालले नियमापत्ति गर्दै अर्थमन्त्रीले अप्रमाणित कुरा गरेको आरोप लगाए ।
‘विगतको सन्दर्भ कोट्याएर मलाई समेत अभियोग लगाउन आँटेका थिए, अहिलेका कर्मचारीले भन्छन् भनेर अर्थमन्त्रीले भन्नुभयो । विगतमा अभियेग के थियो ? को कर्मचारीले त्यस्तो सुनायो ? अर्थमन्त्रीले मनमा लागेको भावना पोख्ने होइन, यथार्थ कुरा भन्नुपर्छ । अप्रमाणित कुरा संसद्मा भन्न मिल्दैन’, बरालले भने ।
अर्थमन्त्री वाग्लेले राजनीतिक अभीष्ट पूरा गर्ने उद्देश्यका साथ सम्पत्ति शुद्धीकरणको विषयलाई सशस्त्र हरियारको रूपमा दुरूपयोग गरिएको समेत बरालले आरोप लगाए ।
