०२ साउन २०८३, शनिबार
प्रधानमन्त्री बालेन्द्र शाह (बालेन)को नाम लिएर अभिव्यक्ति दिएका नेपाल प्रहरीका एक डीएसपीलाई जिल्ला झिकाएको विषयमा कांग्रेस सांसदले आपत्ति जनाएका छन् ।
प्रतिनिधिसभाको बिहीबारको बैठकमा यस घटनाबारे बोल्दै कांग्रेस सांसद खड्ग शाहीले सरकारले अधिनायकवादी शैली अपनाएको बताए ।
उनले सरकारले कर्मचारीदेखि लिएर सबै क्षेत्रमा त्रास जन्माएको टिप्पणी गरे ।
‘राष्ट्रसेवक व्यक्तिले हामी राजनीतिक नेतृत्वको नभइ कानूनको सेवक हौं भन्नु गलत हो ? सो भनाइप्रति डीएसपीले सजाय खानुपर्ने हो ?’, सांसद शाहीले भने ।
कैलालीको इलाका प्रहरी कार्यालय सुखड कैलालीका डीएसपी प्रसन्नराज चौधरीले लागूऔषधसम्बन्धी सचेतनामूलक कार्यक्रममा ‘हामी बालेनको पुलिस पनि होइनौं, नेपाल पुलिस हो । अन्याय र अत्याचारमा परेकालाई न्याय दिलाउने पुलिस हो । केपी ओलीलाई समाउने पुलिस पनि यही हो’ भनेका थिए ।
उनको अभिव्यक्तिको भिडिओ सामाजिक सञ्जालमा फैलिएपछि सोधपुछका लागि जिल्ला प्रहरी कार्यालय कैलाली झिकाइएको छ ।
विद्यार्थीलाई सिकाउने क्रममा डीएसपी चौधरीले नेपाल प्रहरीले लगाएको बर्दी राष्ट्रपतिले समेत लगाउन नपाउने उल्लेख गरेका थिए ।
