नक्कली शैक्षिक योग्यताको प्रमाणपत्र पेस गरेर जागिर खाएको आरोपमा कैलालीकी एक बालविकास शिक्षिकाविरुद्ध भ्रष्टाचार मुद्दा दायर भएको छ ।

अख्तियार दुरुपयोग अनुसन्धान आयोगले कैलालीको जानकी गाउँपालिका–३, नयाँ लायकपुरस्थित श्री मुक्त कमैया बाल संरक्षण आधारभूत विद्यालयमा कार्यरत बालविकास शिक्षक नन्दाकुमारी शाहीविरुद्ध शुक्रबार विशेष अदालतमा मुद्दा दायर गरेको हो ।

आयोगका प्रवक्ता प्रवक्ता सुरेश न्यौपानेका अनुसार शाहीले २०६६ साल मंसिर ३ गते सोही विद्यालयमा बालविकास शिक्षक पदमा नियुक्ति लिनका लागि भारतको उत्तर प्रदेशस्थित माध्यमिक शिक्षा परिषद्‌बाट माध्यमिक तह उत्तीर्ण गरेको भनी झुट्टा (नक्कली) शैक्षिक योग्यताको प्रमाणपत्र पेस गरेकी थिइन् ।

सोही नक्कली प्रमाणपत्रका आधारमा उनले सरकारी ओहोदा (पद), लाभ र सेवा–सुविधा लिएको अनुसन्धानबाट खुलेको आयोगको दाबी छ ।