०४ साउन २०८३, सोमबार
राष्ट्रिय प्रजातन्त्र पार्टी (राप्रपा) का सांसद ज्ञानबहादुर शाहीले हिजो मान्छेको ज्यान ठूलो भन्नेहरू आज नियम ठूलो भन्न थालेको भन्दै कटाक्ष गरेका छन् ।
प्रतिनिधिसभाको सोमबारको बैठकमा बोल्दै शाहीले नियम कार्यान्वयनका नाममा नागरिकको जीवनको उपेक्षा गर्न नमिल्ने बताए ।
उनले विगतमा ‘सिंहदरबारभन्दा मान्छेको जीवन ठूलो’ भन्नेहरूले नै अहिले ‘मान्छेको जीवनभन्दा नियम ठूलो’ भन्न थालेको टिप्पणी गर्दै मानवीय संवेदनशीलता कमजोर हुँदै गएको आरोप लगाए।
शाहीले कुनै व्यक्तिको ज्यान गोली हानेर मात्रै नजाने भन्दै बाँच्ने आधार खोस्ने, रोजीरोटी बन्द गरिदिने तथा निराशा र पीडाको अवस्थामा पुर्याउने कार्य पनि हत्या सरह हुने धारणा राखे ।
उनले राप्रपाले कहिल्यै पनि जथाभावी सडकमा पार्किङ गर्न पाउनुपर्ने माग नगरेको स्पष्ट पार्दै संसद्को अभिलेख हेर्न आग्रह गरे ।
आफ्नो पार्टीको चासो ट्राफिक नियमको कार्यान्वयनभन्दा बढी प्रहरीको रुखो र अमानवीय व्यवहारप्रति रहेको उनको भनाइ थियो ।
शाहीले ट्राफिक नियम उल्लंघन गर्दा सर्वसाधारणमाथि कारबाही हुने भए पनि सिटबेल्ट नलगाई सवारी चलाउने गृहमन्त्री र प्रधानमन्त्रीमाथि किन कारबाही नहुने ? भनी प्रश्न उठाए ।
शाहीले कानून र न्याय सबै नागरिकका लागि समान रूपमा लागू हुनुपर्नेमा जोड दिँदै राज्यका उच्चपदस्थ व्यक्तिहरू पनि नियमभन्दा माथि हुन नहुने बताए ।
