नेपाल प्रहरीको केन्द्रीय अनुसन्धान ब्यूरो (सीआईबी)ले जेनजी आन्दोलनका क्रममा कारागारबाट फरार भएका एक जनालाई पक्राउ गरेको छ ।

पक्राउ पर्नेमा धादिङको साविक किरानचोक गाविस–५ (हाल गजुरी गाउँपालिका–८) स्थायी घर भई हाल काठमाडौं महानगरपालिका–३, सुन्ताखान बस्दै आएका ४२ वर्षीय दर्जबहादुर तामाङ रहेका छन् । 

तामाङलाई सोमबार काठमाडौंको सुन्ताखानबाट पक्राउ गरिएको सीआईबीले जनाएको छ । २२ वर्ष कैद सजाय पाएका उनी सजाय भुक्तान गर्ने क्रममा जेनजी आन्दोलनका बेला कारागारबाट भागेका थिए । 

तामाङ लागूऔषध मुद्दामा २०७४ असोज २३ गते पक्राउ परेका थिए । उनी २०७४ मंसिर २८ गतेदेखि कारागार कार्यालय जगन्नाथदेवल, सुन्धारामा सजाय भुक्तान गरिरहेका थिए ।

प्रहरीका अनुसार उनी गत वर्ष भएको जेनजी आन्दोलनका क्रममा कारागार कार्यालय जगन्नाथदेवलबाट फरार भएका थिए । त्यसयता काठमाडौं उपत्यकामा लुकीछिपी बसिरहेको अवस्थामा सीआईबीबाट खटिएको प्रहरी टोलीले उनलाई पक्राउ गरेको हो ।

पक्राउ परेका तामाङलाई आवश्यक कारबाहीका लागि कारागार कार्यालय जगन्नाथदेवल, सुन्धारामा बुझाइएको प्रहरीले जनाएको छ ।