मोरङको सुन्दरहरैँचामा विद्यार्थीलाई दुर्व्यवहार गरेको आरोपमा तीन जना पक्राउ परेका छन् ।

पक्राउ पर्नेहरूमा मोरङ सुन्दरहरैँचा नगरपालिका १० का ४० वर्षीय प्रदीप भट्टराई, सुन्दरहरैँचा नगरपालिका २ का ३० वर्षीय किशोरलाल गच्छदार र सुन्दरहरैँचा नगरपालिका १२ का ३५ वर्षीया अविरल मास्के रहेका छन् ।​

सुन्दरहरैँचा नगरपालिका वडा नम्बर १० खोसनिमा रहेको सुकुना माध्यमिक विद्यालयका विद्यार्थीले शिक्षकहरूले दुर्व्यवहार गरेको भन्दै विरोध प्रदर्शन गर्ने भएपछि प्रहरीले अनुसन्धान थालेको थियो ।

अनुसन्धानका क्रममा उनीहरूको संलग्नता देखिएपछि आज बिहान पक्राउ गरिएको जिल्ला प्रहरी कार्यालय मोरङका सूचना अधिकारी प्रहरी नायब उपरीक्षक (डीएसपी) मकेन्द्रकुमार मिश्रले जानकारी दिए ।

घटनामा संलग्न रहेको पाइएमा अन्य व्यक्तिलाई पनि कानूनी दायरामा ल्याउने भन्दै प्रहरीले सामाजिक सञ्जालमा अनावश्यक टिप्पणी नगर्न आग्रह गरेको छ ।

थप अनुसन्धान भइरहेको प्रहरीले जनाएको छ।