काठमाडौं– संसदीय सुनुवाइ विशेष समितिले नेपालको प्रधानन्यायाधीश हुन ‘योग्य नभएको’ भनेर अस्वीकृत गरेपछि घरबिदा लिएर बसेका वरिष्ठतम् न्यायाधीश दीपकराज जोशी मंगलवार सर्वोच्च अदालतमा हाजिर भएका छन् । 

सोमवार संसदीय सुनुवाइ समितिको अनुमोदनपछि प्रधानन्यायाधीशमा नियुक्त भएका ओमप्रकाश मिश्रलाई स्वागत गरेका जोशी मंगलवार नियमित काममा फर्किएका हुन् । जोशी ३९ दिनको बिदा कटाएर मंगलवार सर्वोच्चमा फर्किएका हुन् । 

लोकान्तरसँगको कुराकानीमा जोशीले आफू काममा फर्किएको बताए । तर मंगलवारका लागि उनको पेशी भने तोकिएको छैन । 

नवनियुक्त प्रधानन्यायाधीश मिश्रले मंगलवार १० वटा इजलाशका लागि पेश तोकेका छन् । जसमा न्यायाधीश प्रकाशमानसिंह राउतको एकल बाहेक अन्य संयुक्त इजलाश छन् । 

आफ्नो पेशी नतोकिएको विषयबारे लोकान्तरको प्रश्नमा जोशीले इजलाशमा मेच व्यवस्थापन नभएको हुनसक्ने बताए । ‘म आजदेखि हाजिर भएर काममा फर्किएको छु,’ लोकान्तरसँगको टेलिफोन कुराकानीमा जोशीले भने, ‘सायद मेच मिलाउने काम हुन नसकेकाले आज मेरो पेशी नतोकिएको हुन सक्छ । भोलि (बुधवार)देखि पेशी तोकिन्छ ।’

गत साउन १८ गते (शुक्रवार)को संसदीय सुनुवाइ समितिको बैठकले प्रधानन्यायाधीशमा अस्वीकृत गर्ने निर्णय गरेपछि जोशी विदामा बसेका थिए ।