मेलम्चीको वडामा कागजात थुपारेर लगाइयो आगो, घटना रहस्यमय [भिडियोसहित]

सिन्धुपाल्चोक – जिल्लाको मेलम्ची नगरपालिका–१० को वडा कार्यालयमा अज्ञात समूहले मंगलवार राति आगजनी गरेको छ ।

कार्यालयको ढोकामा लगाएको ताल्चा काटेर गरिएको आगजनीले वडा कार्यालय पूर्णरुपमा क्षतिग्रस्त भएको छ ।


Advertisement

कार्यालयभित्र भएका सम्पूर्ण सामग्री तथा कागजात एकैठाउँमा थुपारेर आगजनी गरिएको प्रहरीले जनाएको छ ।


Advertisement

‘कार्यालयमा नियोजित रुपमा आगो लगाएको देखिन्छ । हिजो मंगलवार कार्यालयको काम सकेर घर गएको थिएँ । आज (बुधवार) बिहानै आगो लगाएको भन्ने सूचना आयो, आएर हेर्दा कार्यालयका सबै कागजपत्र तथा टेबलकुर्सी आगोले पूर्ण रुपमा नष्ट भइसकेका थिए,’ वडाध्यक्ष भक्तबहादुर खड्काले भने ।

घटनाको प्रकृति हेर्दा रहस्यमय देखिन्छ । रातको समयमा ताल्चा काटेर कार्यालयका सम्पूर्ण सामग्री एकै स्थानमा जम्मा परेर जलाइएकाले थप रहस्यमय रहेको स्थानीय भीमप्रसाद दुलालले बताए ।

घटना कसले गरायो भन्ने विषयमा अनुसन्धान शुरू गरेको जिल्ला प्रहरी कार्यालय सिन्धुपाल्चोकका प्रहरी नायव उपरीक्षक माधव काफ्लेले जानकारी दिए ।

काफ्लेले भने, ‘घटनाको प्रकृति हेर्दा विप्लवका कार्यकताले गरेको हुनसक्ने आशंका रहेको बताए तर पनि हामी अनुसन्धानमा छौं । घटनास्थलमा विप्लवको कुनै पनि पत्र तथा पर्चा नभेटिएकाले यसैले भनेर किटान गर्न सक्ने अवस्था छैन ।’

स्थानीय पुण्यप्रसाद दाहालले रातको समयमा वरिपरिका स्थानीय सुतेपछि सुटुक्क आएर जलाउनु षड्यन्त्रमूलक भएको बताए । वडा कार्यालयभन्दा मुनितिर वन क्षेत्र पर्ने भएकाले पनि कार्यालयसम्म आइपुग्न सजिलो भएको हुनसक्ने दाहालले बताए ।

स्थानीयले घटना भएको थाहा पाउनेवित्तिकै ईलाका प्रहरी कार्यालय मेलम्चीलाई खबर गरेका थिए । एक स्थानीयले भने, ‘हामीले बिहान साढे ५ बजे प्रहरीलाई खबर गरेका थियौं, धेरै पटक आगो लागेको छ तत्काल आउनुपर्‍यो भनेर खबर गरेको भएपनि प्रहरी १० मिनेटको समय आइपुग्ने ठाउँमा २ घण्टासम्म देखापरेन ।’ पछि स्थानीयले सेना र प्रहरीको सहयोगमा आगो नियन्त्रणमा लिएका थिए ।

वडा कार्यालयको भवनमा भएको क्षतिको विवरण संकलन भइरहेकाले कति क्षति भयो भनेर भन्न सकिने अवस्था नभएको प्रहरीले जनाएको छ ।

हेर्नुहोस्, भिडियो :

कमेन्ट गर्नुहोस्