काठमाडौं– अनुमगनका क्रममा पसल बन्द गरेर भागेका गोंगबुका पसलेहरूले वाणिज्य आपूर्ति तथा उपभोक्ता संरक्षण विभागमा आएर जरिवाना तिर्न थालेका छन् ।

गत १२ असोजमा विभागले अनुगमन गर्ने क्रममा अनुगमन टोलीलाई असहयोग गर्ने तथा भाग्ने गोंगबुको बीजी मलका पसेलहरू अन्ततः विभागमा आएर जरिवाना तिर्न थालेका हुन् ।

बिहीवारसम्म विभागमा आएर ९ वटा पसलले जरिवाना तिरिसकेका वाणिज्य आपूर्ति तथा उपभोक्ता संरक्षण विभागले जानकारी दिएको छ ।

विभागका अनुसार बीजी मलको एबी फेसन, सुलु गियर, पवित्रा फेन्सिकोज, द फेन्स बकेट, ढोर पाटन स्पोकु लगायतका पसलेले जरिवाना तिरेर पसल सुचारू गरेका छन् ।

त्यस्तै मनकामना इलेक्ट्रोनिक्स, मंगोलियान ब्रोटर, फेसन ब्लास्ट, सूर्यबहादुर हमाल स्टोर र बोइज हाउसले पनि विभागमा आएर जरिवाना तिरेको विभागले जनाएको छ ।

२४ घण्टे म्याद दिइएका व्यापारीहरूले विभागमा आएर जरिवाना तिरिसकेका विभागका अनुगमन निर्देशक शोभाकर रेग्मीले जानकारी दिए ।

केही व्यापारीलाई ७ दिने म्याद पनि दिइएको र तिनीहरू अझैसम्म नआएकाले ताकेता गरिने विभागले जनाएको छ ।

७ दिने म्याद पाउनेहरूमा बीएण्ड ब्वाइ र एस टाइटन आर  इन्टरनेसनल तथा बी एण्ड डी फेन्सी सूज स्टोर रहेका छन् । 

बी एण्ड सी फेन्सी सुज स्टोरलाई तत्काल जरिवाना तोकिएपनि तिरेको भौचर लिएर विभागमा उपस्थित नभएकाले उक्त पसलको कारोवार फुकुवा नभएको विभागले जानकारी दिएको छ ।

गत १२ असोजमा विभागले ४ वटा अनुमगन टोली बनाएर गोंगुबस्थित बिजी मलमा अनुगमनका लागि पठाएको थियो । अनुमगन टोलीले बी एण्ड डी फेन्सी सूज सेन्टरलाई बिक्री बिल विजक नदेखाएको भन्दै २ लाख रूपैयाँ जरिवाना तोकेको थियो ।

बी एण्ड डीलाई जरिवाना तोक्ने बित्तिकै त्यहाँका अन्य पसलेहरू पसल बन्द गरेर भागेका थिए । भागेपछि विभागले विभागमा उपस्थित भएर जरिवाना तिर्न निर्देशन दिँदै ७ दिने र २४ घण्टे म्याद दिएको थियो । अनुगमनका क्रममा पसलहरू बन्द गरेर भाग्ने पसलहरूलाई विभागले अनुगमनमा असहयोग कसूरमा २०/२० हजार रूपैयाँका दरले जरिवाना गरिरहेको छ ।

यसअघि विभागले काठमाडौं दरबार मार्गका पसलहरूमा अनुगमन थाल्दा त्यहाँका पसलेहरू पनि भागेका थिए । तिनीहरू पनि विभागमा आएर जरिवाना तिरिरहेका विभागले जानकारी दिएको छ ।

विभागले पछिल्लो समय दशैंलाई मध्यनजर गर्दै काठमाडौं उपत्यकामा अनुमगनलाई तीव्रता दिएको छ । असोजलागेयता विभागले १ सय ५५ वटा पसलमा अनुमगन गरेको छ ।