विद्यालयले हाजिर नगराएपछि तिलोत्तमा नगरपालिकाले अपाङ्गता भएका एक स्थायी शिक्षकलाई आइतवार हाजिर गराएको छ । प्रा.वि. तहका स्थायी शिक्षक जीवन पोखरेललाई तिलोत्तमा नगरपालिकाले मंसिर ८ गते पशुपति मावि, कोटिहवामा पदस्थापन गरेको थियो । 

तर सो विद्यालयले अपाङ्गताको कारण देखाउँदै हाजिर गराएको थिएन । पोखरेल दृष्टिविहीन हुन् । जिल्ला शिक्षा विकास तथा समन्वय इकाई रुपन्देहीले मंसिर २ गते स्थायी नियुक्ति दिँदै उनलाई तिलोत्तमा नगरपालिका पठाएको थियो । तिलोत्तमा नगर शिक्षा समितिको बैठकले पशुपतिमा रिक्त दरबन्दीमा पोखरेललाई पदस्थापन गर्ने निर्णय गरेको थियो । नगर शिक्षा समितिको निर्णयअनुसार उनी हाजिर हुन विद्यालय पुगे पनि विद्यालय प्रशासनले व्यवस्थापन समितिको निर्णय भन्दै हाजिर गराएको थिएन । विद्यालयले हाजिर नगराई बेवास्ता गरेपछि उनी चौरमै बसेर घर फर्किँदै आएका थिए । 

नगरपालिकाको शिक्षा शाखाले हाजिर गराउन विद्यालयलाई पत्राचार गरे पनि त्यसलाई विद्यालयले वास्ता नगरी जवाफ पठाएको थिएन । आइतवार शिक्षा समिति संयोजक तथा नगर प्रमुख बासुदेव घिमिरे र समितिका सदस्य सचिव तथा शिक्षा शाखा प्रमुख गंगाराम आचार्य विद्यालयमैं पुगेर निर्देशन दिएपछि पोखरेलले  हाजिर गर्न पाएका हुन् । विद्यालय जान थालेको २१ दिनपछि शिक्षक पोखरेललाई हाजिर गराइएको उप–सचिव गंगाराम आचार्यले बताए ।  

पोखरेलले शिक्षक सेवा आयोगको परीक्षा उत्तीर्ण गरेका हुन् ।’ प्रचलित नियमअनुसार मात्र होइन मानवीयताको कारण पनि हाजिर गराउनुपर्थ्यो । त्यसो नभएपछि हामीहरू आफैं विद्यालय पुगेर हाजिर गरायौं । पदस्थापन गरिएका शिक्षकलाई हाजिर नगराउने कामलाई कदापी राम्रो मानिँदैन,' उनले भने । संविधानअनुसार मावि तहसम्मको शैक्षिक अधिकार स्थानीय तहमा छ । 

शिक्षक सेवा आयोग पास गरेका दक्ष र क्षमतावान शिक्षकलाई विद्यालयले अपाङ्गतालाई नै कारण बनाएर हाजिर गर्न नदिएकाले यो विषयमा आफूहरूको ध्यानाकर्षण भएको नगर प्रमुख बासुदेव घिमिरेले बताए । पदस्थापनलगत्तै निकै हर्षित भएर स्कुल पुगे पनि पोखरेललाई प्रधानाध्यापक वेदनारायण भट्टराईले हाजिर गर्न दिएनन् । अपाङ्गता भएका कारण आफ्नो विज्ञतालाई बेवास्ता गरेकामा पोखरेलको दुखेसो छ ।

’म कसैको दयामायाले शिक्षक सेवा आयोग पास गरेको होइन । मेरो क्षमता र दक्षतामाथि नै आँच पुग्ने गरी अपमानित गर्दा म निकै दुःखी छ । भोलि अर्को स्कूलमा सर्न सकिन्थ्यो होला तर मलाई राज्यले नियुक्ति गर्दा पनि हाजिर हुन दिइएन,’ पोखरेलले भने,’ आज नगरपालिकाको पहलमा हाजिर हुन पाउँदा न्याय पाएको महसूस गरेको छु ।’