सुनसरीको बराहक्षेत्र नगरपालिका– १ स्थित सप्तकोशी नदीमा डुवेका दुई जनाको सशस्त्र प्रहरीले बिहीवार (वैशाख १४ गते) सकुशल उद्धार गरेको छ ।

धरान उपमहानगरपालिका ३ बस्ने २३ वर्षीय रविन परियार र झापा जिल्लाको गौरदह गाउँपालिका– ३ बस्ने २१ वर्षीय तुलसीप्रसाद पराजुली नुहाउने क्रममा नदीमा डुबेका थिए । 

सोबारे जानकारी पाउनासाथ सुरक्षा बेस चतराबाट खटिएको विपद् व्यवस्थापनसहितको सुरक्षा फौजले मोटर बोटको सहायताले उनीहरूको सकुशल उद्धार गरेको सशस्त्रका प्रवक्ता डीएसपी शैलेन्द्र थापाले जानकारी दिए । उनीहरुको अवस्था भने सामान्य रहेको उनले जनाए । 

यसअघि वैशाख ४ गते सप्तकोशी नदीमा नुहाउने क्रममा डुबेका चारजना र वैशाख १२ गते नदीमा हाम फालेका एक व्यक्तिको सशस्त्र प्रहरीले सकुशल उद्धार गरेको थियो ।