१२ असार २०८३, शुक्रबार
सुनसरीमा डाक्टरले चलाएको कारको ठक्करबाट नेपाल प्रहरीका वरिष्ठ प्रहरी नायब निरीक्षक (वरिष्ठ सई)को मृत्यु भएको छ ।
हुलाकी राजमार्गअन्तर्गत बर्जु गाउँपालिका– ६ नरह चोकनजिक मंगलबार दिउँसो भएको दुर्घटनामा वरिष्ठ सई लालकुमार यादवको मृत्यु भएको हो ।
सुनसरी प्रहरी प्रमुख एसपी केशवकुमार थेबेका अनुसार विराटनगरबाट बर्जुको चिमडीतर्फ जाँदै गरेको प्र १–०२–००२ च ६२५२ नम्बरको ईभी कारले विपरीत दिशाबाट आउँदै गरेको प्र १–०१–००३ प २६१२ नम्बरको मोटरसाइकललाई ठक्कर दिएको थियो ।
दुर्घटनामा परेर मोटरसाइकल चालक सप्तरीको विष्णुपुर गाउँपालिका–१ घर भएका ५० वर्षीय वरिष्ठ सई यादव गम्भीर घाइते भएका थिए ।
टाउको र शरीरका विभिन्न भागमा चोट लागेका उनलाई उपचारका लागि विराटनगरस्थित विराट नर्सिङ होम भर्ना गरिएकोमा उपचारकै क्रममा उनको मृत्यु भएको प्रहरीले जनाएको छ । मृतक यादव जिल्ला प्रहरी कार्यालय बारामा कार्यरत थिए ।
दुर्घटनामा यादवकी ४७ वर्षीया पत्नी रामपरी यादव घाइते भएकी छन् । उनको दाहिने खुट्टामा चोट लागेको र अवस्था सामान्य रहेको छ । हाल उनको विराट नर्सिङ होममै उपचार भइरहेको छ ।
प्रहरीले कार चालक मोरङको कटहरी गाउँपालिका–३ घर भएका ५० वर्षीय रेडियोलोजिस्ट डा. राजेन्द्र चौधरीलाई नियन्त्रणमा लिएको छ ।
डा. चौधरी चिमडी बजारमा एक्स–रे गर्नका लागि जाँदै गर्दा दुर्घटना भएको प्रारम्भिक अनुसन्धानबाट खुलेको छ ।
घटनाबारे थप अनुसन्धान भइरहेको प्रहरीले जनाएको छ ।
