सामुद्रिक शास्त्रका माध्यमले हामीले जोकोहीको पनि व्यक्तित्व पनि विश्लेषण गर्न सक्छौं । मान्छेको हाँस्ने शैलीबाट पनि उसको व्यक्तित्वका बारेमा थाहा लाग्छ ।

मजाले गलल्ल हाँस्ने मानिस सहृदयी, सहनशील, दयालु र सबैको भलो चाहने खालको हुन्छ । यस्तो मानिसमाथि विश्वास गर्न सकिन्छ । भगवानको भक्तिमा मन लाग्छ यस्तो मानिसलाई । यस्ता मान्छेले सबैलाई खुशी राख्छन् । प्रेमजीवनमा पनि यिनीहरू इमान्दार हुन्छन् ।

चर्को स्वरमा हा हा गर्दै हाँस्ने मानिस उच्च स्थानमा पुग्नका लागि सदैव प्रयत्नशील हुन्छन् । उनीहरूको हाँसोमा अहंकार पनि झल्किन्छ । उनीहरू अर्काको कुरा काट्दैनन् । यिनीहरूको अहंकारमा कसैले चोट पु–यायो भने चाहिँ यिनीहरूले त्यसलाई बाँकी राख्दैनन् । यस्ता मानिस समाजमा लोकप्रिय हुन्छन् । मान्छेलाई प्रयोग गर्ने कलामा यिनीहरू निपूण हुन्छन् ।

रोकिई रोकिई हाँस्ने मानिसहरू आफ्नो काममा चतुरा हुन्छन् । यस्ता मान्छेको दिमागमा केही न केही कुरा घुमिरहेको हुन्छ । यिनीहरू अर्काको कुरा बुझेर त्यसै अनुसारको व्यवहार गर्छन् । यिनीहरू सन्तुलित हुन्छन् तर यिनीहरूमा केटौलोपना देखिन्छ ।

शान्त मुस्कान हुनेहरू मनको प्रसन्नता अभिव्यक्त गर्न हिचकिचाउँदैनन् । यस्ता मानिस गम्भीर, धैर्यवान्, शान्त, विश्वासी र चरित्रवान् हुन्छन् । आफ्ना कुरालाई थोरै शब्दमा व्यक्त गर्न सक्छन् यिनीहरूले । सबैका साथ सामान्य व्यवहार गर्छन् । शान्त स्वभावका साथ सबैलाई आफूतिर आकर्षित गर्छन् । 

घोडाले हिनहिनाएको जस्तो गरी हाँस्ने मानिसहरू फटाहा, धूर्त, अहंकारी र चरित्रहीन हुन्छ । आफ्नो स्वार्थ पूरा गर्न यिनीहरू जे पनि गर्छन् । स्वार्थ पूरा भएपछि यिनीहरू व्यक्तिलाई बिर्सिदिन्छन् र अझ कुरा पनि काटिदिन्छन् । यस्ता मानिसबाट टाढा हुनु बेश । 

सबैसँग मिलेर हाँस्ने र सानो सानो कुरामा पनि अकारण हाँस्ने मानिस मिलनसार हुन्छन् तर त्यत्तिकै स्वार्थी पनि हुन्छन् । यिनीहरूलाई बुझ्न अलि गाह्रै हुन्छ । कसैलाई प्रयोग गरेर आफ्नो स्वार्थ साँध्न यिनीहरू माहिर हुन्छन् । यिनीहरूको दिमागमा जतिखेर पनि स्वार्थपूर्तिका कुरा घुमिरहेका हुन्छन् । 

हाँस्दाखेरी गालामा डिम्पल बन्ने मानिसहरू सबैसँग छिट्टै घुलमिल गर्छन्, आत्मविश्वासी हुन्छन्, मिलनसार र रोमान्टिक हुन्छन् । गालामा डिम्पल पर्ने युवतीहरू प्रेमी फेर्दै हिँड्ने खालका हुन्छन् । यिनीहरू संवेदनशीलका साथसाथै जिद्दी पनि हुन्छन् । 

एजेन्सीको सहयोगमा