सूदूरपश्चिमको एक मात्रै ठूलो विमानस्थलको रुपमा रहेको धनगढी विमानस्थल अब अन्तर्राष्ट्रिय मापदण्ड अनुसारको बन्ने भएको छ ।

नेपाल नागरिक उड्डयन प्राधिकरणले शनिवार धनगढीमा संस्कृति, पर्यटन तथा नागरिक उड्डयन मन्त्री योगेशकुमार भट्टराईको उपस्थितिमा विमानस्थलको गुरुयोजना सार्वजनिक गरेको छ ।

प्राधिकरणको लागि रियल पथ इन्जिनियरिङ कन्सल्टेन्सीले तयार पारेको गुरुयोजना अनुसार सन् २०४० सम्ममा ३ चरणमा निर्माण कार्य हुने भएको छ । जसको लागि प्रारम्भिक चरणमा विमानस्थल निर्माणको लागि थप २४४ विघा जग्गा अधिग्रहण गर्नुपर्ने जनाइएको छ ।

कन्सल्टेन्सीका इन्जिनीयर गुरुदत्त अधिकारीका अनुसार हाल ७० विघामा फैलिएको विमानस्थल अधिग्रहणपछि जम्मा २९७ विघामा बन्ने भएको छ । बन्ने संरचनाहरू अन्तर्राष्ट्रिय नागरिक उड्डयन संगठन (आईकाउ) लगायतको मापदण्ड हुने र मान्यता पाउने इन्जिनीयर गुरुदत्त अधिकारीले जानकारी दिए । 

यसैबीच १५० वटा विभिन्न संरचना निर्माण गरिने भएका छन् । विमानस्थल निर्माणको पहिलो चरण सन् २०२४ सम्म रहने भएको छ । यस चरणमा जग्गा अधिग्रहणसहित सडक विस्तारलगायत कार्य हुने भएका छन् ।

सन् २०२५ देखि २०३० सम्ममा २ हजार ५५० मिटर लामो र ४५ मिटर चौडा नयाँ धावन मार्ग, ट्याक्सी बाटो, पार्क, पार्किङ, पानी ट्यांकी, इन्धन स्टेसन, शौचालयलगायत विभिन्न संरचना निर्माण गरिने जनाइएको छ भने सन् २०३० देखि २०४० सम्ममा नयाँ टर्मिनल भवन, कन्ट्रोल टावर सबस्टेसन एयरलाइन ब्लक, एप्रोन विस्तार,  ट्याक्सी बाटो, वायु विज्ञान कार्यालय, कार्गो कम्प्लेक्स, सेमिनार हल, सुरक्षा भवन, क्यान्टिन, केन्द्र्रीय भण्डार गृह, एयरपोर्ट रोड, कर्मचारी क्वार्टर, हंगर, विमान पार्किङस्थल, पानी निकास लगायतका संरचना निर्माण गरिने जनाइएको छ ।

पहिलो चरणमा निर्माणको लागि १ अर्ब ८ करोड, दोस्रो चरणमा ४ अर्ब ९८ करोड र तेस्रो चरणमा ६अर्ब ८ करोड गरी जम्मा १२ अर्ब १४ करोड बजेट लाग्ने जनाइएको छ ।

स्थानीयमा विकासको हुटहुटी

जनप्रतिनिधि, राजनीतिक दल, पर्यटन व्यवसायीलगायत स्थानीय विमानस्थल निर्माणमा तीब्रता दिनुपर्ने माग राखेका छन् । कैलाली निर्वाचन क्षेत्र नम्बर ५ का प्रतिनिधिसभा सदस्य नारदमुनि रानाले विकासको दृष्टिले पछाडि परेको क्षेत्रको विकासको लागि विमानस्थलमा तीव्रता दिनुपर्ने सुझाव दिए । उनले जग्गा अधिग्रहण गरिने क्षेत्रको ४ किल्ला तत्कालै तोकिनुपर्ने बताउँदै उनले जग्गाको नक्सा निर्माण तथा खरिदबिक्री बन्द गर्नुपर्ने बताए । स्थानीय जनतालाई सुसूचित गर्नेतर्फ स्थानीय तह लाग्नुपर्ने उनले बताए ।

सुदूरपश्चिम प्रदेशको उद्योग पर्यटन मन्त्री माया भट्टले संघीय सरकारले सहकार्य गरे प्रदेश सरकार पनि विमानस्थल निर्माणको लागि लगानी थप्ने बताइन् ।

स्थानीयले २० वर्षे गुरुयोजना छोट्याउनुपर्ने माग राखेका छन् । विकासप्रति सरकारको तत्परता भए कम समयमा पनि विकास भएका धेरै रहेको बताउँदै छोट्याउनुपर्ने माग राखेका हुन् । कार्यक्रममा प्रदेशसभा सदस्य दीर्घ सोडारी, धनगढी उपमहानगरपालिकाका मेयर नृप वड, गोदावरी नगरपालिकाका मेयर हरिसिंह साउँद, पर्यटन व्यवसायी गोपाल हमाल, माया प्रकाश भट्ट, कैलालीका प्रमुख जिल्ला अधिकारी यज्ञराज बोहरा, पत्रकार जगत साउँद, शिवराज भट्टलगायत बोलेका थिए । प्राधिकरणका महानिर्देशक राजन पौडेलले स्थानीयको साथ सहयोग पाएको अवस्थामा निर्माणले गति पाउने बताए ।

स्थानीयको चासोप्रति मन्त्री प्रफुुल्लित

संस्कृति, पर्यटन तथा नागरिक उड्डयन मन्त्री भट्टराईले धनगढी विमानस्थल विस्तार गर्न मन्त्रालय तत्पर रहेको बताएका छन् । तत्कालै विमानस्थल स्तरोन्नतिका लागि आवश्यक पर्ने जग्गा अधिग्रहणको प्रक्रिया छिट्टै थालिने बताउँदै मन्त्री भट्टराईले जग्गा अधिग्रहणको लागि धनगढी उपमहानगरपालिका र गोदावरी नगरपालिकालाई तयारीमा रहन आग्रह गरेका छन् ।

उनले बन्द अवस्थामा रहेको कञ्चनपुरको मझगाउँ विमानस्थल र टीकापुर विमानस्थल सञ्चालनको लागि स्थानीय तह पनि बजेटमा साझेदारी गर्न अग्रसर रहेको बताउँदै चाँडै नै सञ्चालनमा आउने विश्वास व्यक्त गरे ।