एक महिनाअघि ७८ वर्षीय एक सेवानिवृत्त डकर्मी नोभल कोरोनाभाइरसबाट युरोपमा मर्ने पहिलो व्यक्ति बने । 

त्यतिखेर इटलीको जीवन सामान्य देखिन्थ्यो । क्याफे र बारहरू भरिभराउ थिए, पर्यटकीय गन्तव्यहरूमा भीडभाड थियो र राजनीतिमा नाटकीयता कायम थियो । 

इटलीका सडकहरू अहिले सुनसान छन् र देशले एक शताब्दीयताको सबभन्दा खराब महाव्याधिलाई रोक्नका लागि संघर्ष गरिरहेको छ । 

चीनमा पहिलोपटक देखिएको महाव्याधिले इटलीमा सबभन्दा धेरै मानिसको ज्यान लिएको छ । 

पादुआ नामक स्थानमा ती सेवानिवृत्त डकर्मीको मृत्युपछि कोरोनाका केसहरू ह्वात्तै बढेर गए अनि सरकारले उक्त क्षेत्रका शहरहरूलाई आइसोलेट गर्‍यो । 

‘सबै कुरा नियन्त्रणमा छ,’ प्रधानमन्त्री जोसेप्पे कोन्तेले पहिलो लकडाउनपछि देशलाई बताए । 

उनले इटलीको भूमिमा नयाँ भाइरस फैलिएकोमा उत्पन्न भएको डरलाई दबाउन खोजेका थिए । 

तर उनको आत्मविश्वास आलोकाँचो देखियो । अहिले देशमा ५ हजार ४७६ जनाको मृत्यु कोरोनाभाइरसकै कारण भइसकेको छ अनि ५९ हजार १३८ जना संक्रमित बनेका छन् । यो सार्वजनिक स्वास्थ्य संकटले इटलीको स्वास्थ्य सेवा प्रणालीलाई जर्जर बनाएको छ । 

भाइरसको केन्द्रविन्दुका रूपमा रहेको उत्तरी भागका स्थानीय तथा क्षेत्रीय नेताहरूले कोन्तेलाई सैन्य तैनाथी गर्न आह्वान गरेका छन् । थप मानिसहरूलाई घरैमा नरोकेमा रोग फैलिरहने उनीहरूको भनाइ छ । 

अनि चीनको रेडक्रसका स्वास्थ्यविद्हरूले लोम्बार्डी क्षेत्रका अस्पताललाई सहायता गरिरहेका छन् र अझै धेरै काम गर्न बाँकी रहेको बताएका छन् । 

‘तपाईंहरू सबै किसिमका आर्थिक गतिविधि बन्द गर्नुपर्छ, सबैजना घरमै बस्नुपर्छ,’ समूहका उपाध्यक्ष सुन शुओपेङले बताए । 

‘तपाईंहरूले कठोर उपाय अपनाइरहनुभएको छैन,’ उनले चेतावनी दिए । 

थप अनुशासन आवश्यक रहेको आह्वान गर्ने उनीहरू मात्र हैनन् । दक्षिणी भागका अधिकारीहरूले सामाजिक सञ्जालमा कठोर सन्देश प्रवाह गर्दै घरैमा बस्न मानिसहरूलाई भनेका छन् । 

छिमेकीहरू घुलमिल गर्ने, बार्बेक्युमा रमाउने, बाहिर निस्केर खानेकुरा र चुरोट किन्ने अनि घरमा बस्दा तनाव भयो भन्ने पटमूर्खमाथि डेलिया शहरका मेयर जियानफिलिप्पो बानचेरीले आक्रोश प्रकट गरे । 

शनिवार ब्रेसिया अस्पतालको आईसीयूका प्रमुख जोसेप्पे नतालिनीले इटालेलीहरूलाई थप ध्यान दिन आग्रह गरे । ब्रेसिया मिलान शहरभन्दा १०० किलोमिटर पूर्वतिर पर्छ र त्यहाँ लगभग ५ हजारजनामा संक्रमण देखिएको छ । 
‘नियन्त्रणको आदेशलाई बेवास्ता नगर्नुस्,’ नतालिनीले राइ न्युज२४ लाई बताए । 

इटलीमा कोरोना संक्रमण बढेको बढ्यै छ र स्वास्थ्यविद्हरूले यसको चरम स्थिति अझै आउन बाँकी रहेको बताए । ब्रेसिया लगायतका स्थानमा अस्पतालहरू कुनै पनि बेलामा सेवाप्रवाह गर्न नसक्ने स्थिपतमा पुग्दैछन् ।

चिकित्सकहरू, नर्सहरू र अन्तिम संस्कार गराउने पादरीहरू भाइरसबाट मरिरहेका छन् अनि प्रत्येक दिन नयाँ नयाँ केस र मृत्युका खबर आइरहेका छन् ।

द लोकल डट् इटबाट