लकडाउनको बेला सुर्खेत प्रहरीबाट मानव अधिकार उल्लंघनका घटनामा वृद्धि भएको छ । जसको शिकार बुधबार सुर्खेतका एकजना पत्रिका वितरक प्रकाश आचार्य भएका छन् ।

घरनजिकै चिनी लिन गएको बेला आचार्यलाई प्रहरीले निर्घात कुटपिट गरेको छ । दिउँसो करिब ३ बजे लाटीकोइलीमा मोटरसाइकलमा आएका दुईजना प्रहरीले लठ्ठीले कुटेका आचार्यले बताए ।

‘घरको आडैमा रहेको पसलमा चिनी लिन भनेर आधा खोलिएको सटरबाट भित्र पस्न लागेको थिएँ, एक्कासी आएर गर्दै कुटपिट गर्न थाले,’ उनले भने, ‘कुटेपछि उनीहरू मोटरसाइकलमा आफ्नो बाटो लागे ।’

आचार्यको हात, खुट्टा र ढाडमा चोट लागेको छ । खुट्टाको घाउमा टाँका लगाइएको उनले बताए । उनीहरूले किन बाहिर निस्किएको भन्दै कुटपिट गरेको उनको भनाइ छ ।

रमा आचार्य भेरी एफएममा कार्यरत छिन् । वीरेन्द्रनगर एकमा रहेको उनको घर बाहिर बसिरहेको अवस्थामा गएको सातामा मोटरसाईकलमा सवार दुई जना प्रहरीले गाली गर्दै उनको परिवारलाई त्रसित बनाए ।

‘कम्तिमा प्रहरी संयमित हुनु पर्ने हो तर प्रहरी नै नागरिक प्रति अनुत्तरदायी देखिन्छ । भद्दा गाली सुन्नको लागि प्रहरीको बाटो कुरेर बसे हुन्छ,’ उनले भनिन्, ‘जथाभावी गाली गर्दै हिडने प्रहरीलाई छुट छैन ।’

पत्रकार रमाले लकडाउनको अवधिमा बाहिर गई खाद्यान्न लिन जाने समय बारे जानकारी दिएतापनि प्रहरीले साढेपाँच बजे नै मनलाग्दी थर्काएको लोकान्तरसँग गुनासो पोखिन् ।

वीरेन्द्रनगरकै यरिचोकमा केहि दिन अघि प्रदेश प्रहरी कार्यालय सुर्खेतमा कार्यरत प्रहरी सहायक निरीक्षक नारायण प्रसाद शर्माले मापसे गरेर केहि युवाहरूमाथि हातपात गरे । नागरिक कोरोनबाट त्रसित भएको समयमा सुरक्षा निकायबाट भइरहेका यस्ता गतिविधिले नागरिक थप त्रसित बन्दै गइरहेका छन् ।

चैत २९ गते शनिहल लाईनमा प्रहरी आयो । साँझपख आएको प्रहरीले जथाभावी नागरिकको पसलमा लट्ठी हिर्काउने, सामान खरिद गर्न आएका नागरिकमाथि लट्ठी हान्ने काम गरेको थियो ।

जुम्ला घर भएका, हाल सटरसहितको कोठामा बस्दै आइरहेका हस्तबहादुर बुढाले सञ्चालन गरिरहेको विसी खाद्य खुद्रा पसलमा जथाभावी लाठी हिर्काउँदा उनको सिसासहितको काउण्टर नै फोडियो । ‘अरुले फुटालेको भए प्रहरीकहाँ उजुरी गर्न जानुहुन्थ्यो । प्रहरी आफैंले लाठी हानेर फुटाएपछि कहाँ जानु ?’ बुढाले भने, ‘कम्तिमा प्रहरीले ताडफोडमै नउत्रेको भए हुन्थ्यो, शक्ति भएपछि जसले जे गरेपनि हुने देश नेपाल नै हो भन्थे हो रहेछ ।’

जिल्ला प्रहरी कार्यालय सुर्खेतका सूचना अधिकारी एवम प्रहरी निरीक्षक गोपाल रायमाझीले प्रहरीले कसैलाई पनि गालीगलौज नगरेको, कुटपिट नगरेको दाबी गरे ।

‘हामीले नागरिकहरु घरभित्रै बस्न आग्रह गरिरहेका छौं । नमानेपछि हल्का कतै तर्साएको हुनसक्छ,’ उनले भने, ‘हामी संयमित भएका छौं । हामी भरसक कसैलाई केहि नगरौ भन्नेमा छौं । लाटीकोइलीमा बारम्बार सम्झाउँदा पनि पसल बन्द नगरेकोले उहाँले त्यस्तो आरोप लगाउनु भएको होला । बरु उहाँको हातमा गोभी थियो । त्यो खसेको हो । कसैलाई कुटपिट गरेका छैनौं ।’