सुर्खेतमा नेपाल प्रहरीले मानव अधिकारको उल्लंघन गरेको समाचार लोकान्तरमा प्रकाशित भएपछि राष्ट्रिय मानव अधिकार आयोगको कार्यालय जुम्लाको ध्यानाकर्षण भएको छ ।

आयोगको कार्यालयले समाचारलाई उजुरीको रुपमा लिएर अनुसन्धान अघि बढाएको शाखा कार्यालय जुम्लाका प्रमुख रमेश थापाले जानकारी दिए ।

‘घटनाबारे आयोगले प्रहरी उपरीक्षक दिल्लीराज पन्त र पीडित व्यक्ति प्रकाश आचार्यसँग कुराकानी गरेको छ । समाचारका आधारमा हामीले उजुरी बनाई अनुसन्धान गरिरहेका छौं,’ प्रमुख थापाले भने, ‘यसका अलावा अनुगमन समितिले पनि अनुगमन गर्ने भएको छ ।’

अनुगमन समितिमा बार एसोसियसन, नेपाल पत्रकार महासंघ कर्णाली प्रदेश, गैरसरकारी महासंघ कर्णाली प्रदेश लगायतको प्रतिनिधित्व रहने उनले बताए ।

लकडाउनको बेला सुर्खेत प्रहरीबाट मानव अधिकार उल्लंघनका घटनामा वृद्धि भइरहेको छ । जसको शिकार बुधवार सुर्खेतका पत्रिका वितरक प्रकाश आचार्य भएका छन् । प्रहरी हवल्दार एलबी रावतले आफूमाथि आक्रमण गरेको उनले बताएका थिए ।

घरनजिकै चिनी लिन गएको बेला आचार्यलाई प्रहरीले निर्घात कुटपिट गरेको छ । दिउँसो करीब ३ बजे लाटीकोइलीमा मोटरसाइकलमा आएका २ जना प्रहरीले लाठीले कुटेका आचार्यले बताएका थिए ।