२१ जना एकसाथ कोरोना जितेर घर फर्किँदै

प्रदेश नम्बर पाँचको बाँकेबाट एकसाथ शुक्रवार कोभिड–१९ (कोरोना भाइरस) लाई जितेर घर फकिँदै छन् । बाँकेको खजुरास्थित सुशील कोइराला प्रखर अस्पतालको आइसोलेसनमा उपचार गराइरहेका २१ जना घर फर्किन लागेका हुन् ।

निको हुनेमध्ये ११ देखि ६० वर्ष उमेर समूहका छन् । उनीहरू वैशाख १९, २१ र २३ गते संक्रमण पुष्टि भएर अस्पतालमा आएका हुन् । सो अस्पतालमा अझै ७ जना उपचाररत छन् । उनीहरु सबै नेपालगञ्ज उपमहानगरपालिका वडा नम्बर ५ र ८ नम्बर वडाका हुन् ।

प्रदेश पाँचमा वैशाख १९ गते एकसाथ बाँकेका आज डिस्चार्ज हुने ६० वर्षीय पुरुष र रुपन्देहीका २५ वर्षीय युवामा पहिलो पटक कोरोना देखिएको थियो । बाँकेका जनस्वास्थ्य अधिकृत तथा कोभिड १९ फोकल पर्सन नरेश श्रेष्ठ केही बेरमा उनीहरूलाई डिस्चार्ज गरिने बताए ।

उनले लोकान्तरसँग भने, ‘हामीलाई असाध्यै खुसी लागेको छ । तीन हप्तामा उहाँहरुलाई निको बनाएर घर पठाउँदा हामी पनि खुसी छौं । उहाँहरुलाई अस्पतालमा बस्दा कुनै पनि लक्षण देखिएन । आज घर गएर दुई हप्ता होम क्वारेन्टाइनमा बस्न आग्रह गरेका छौं ।’

श्रेष्ठले थपे, ‘हामी हुन् लक्ष्यका साथ उपचारमा खटियौं, आज त्यो लक्ष्य पूरा भएको छ । यसमा चिकित्सक, स्वास्थ्यकर्मी, सुरक्षाकर्मी लगायत सबै खुसी छौं ।’

योसँगै प्रदेश पाँचमा कोरोना निको हुनेको संख्या २२ पुगेको छ । रुपन्देहीको कोटहीमाईका पहिलो संक्रमित युवा एक हप्ता अगाडि कोरोना जितेर घर फर्किसकेका छन । प्रदेश पाँच कोरोनाको इपिसेन्टर बन्न पुगेको छ । सबैभन्दा धेरै बाँके जिल्लामै कोरोना संक्रमित छन । त्यहाँ ९१ जना कोरोनालाई कोरोना संक्रमण पुष्टि भएको छ । त्यहाँको नरैनापुर गाउँपालिकाका सबैभन्दा धेरै संक्रमित छन् ।

खजुरा गाउँपालिकाका अध्यक्ष किस्मत कुमार कक्षपतिले यति धेरै संख्यामा निको भएर घर फर्किएपछि कोरोनासँग डराउनुपर्ने अवस्था नरहेको बताए । उनले भने, ‘कोरोना भाइरसँग लड्न सकिन्छ । आफूले आफूलाई सुरक्षित राखौं आत्मबल बढाएर बसे कोरोनालाई सजिलै जित्न सकिन्छ ।’

कक्षपतिले उनीहरुलाई केही समयभित्रै डिस्चार्ज गरी घर पठाइने लोकान्तरलाई जानकारी दिए । आइसोलेसन सेन्टर बाँकेमा ४१ जना, लायन्स अस्पताल खजुरामा २२ जना पनि उपचाररत छन् ।

प्रदेश पाँचका ७ वटा जिल्लामा कोरोना संक्रमण देखिएको छ । भने दुई जनाको मृत्यु भएको छ । बाँकेको नरैनापुरका २५ वर्षीय युवा र गुल्मीका ४१ वर्षीया शिक्षकको कोरोना भाइरसका कारण मृत्यु भएको छ । योसँगै कोरोना संक्रमणबाट मृत्यु हुनेको संख्या ३ पुगेको छ । भने संक्रमण ४ सय ८७ पुगेको छ । सबैभन्दा बढी कोरोना प्रदेश पाँच र प्रदेश दुईमा संक्रमित छन् ।