लेबननको राजधानी बेरुतमा सुरक्षाकर्मीहरूले प्रदर्शनकारीमाथि अश्रूग्यास प्रहार गरेका छन् । मंगलवार भएको विस्फोटले राजधानी शहर तहसनहस भएपछि मानिसहरू सरकारप्रति आक्रोशित भई प्रदर्शनमा आएका हुन् । 

सरकारी सञ्चारमाध्यमले खबर दिएअनुसार, सरकारविरोधी प्रदर्शनकारीहरू मध्य बेरुतमा सुरक्षाकर्मीहरूको सामना गरेका थिए । केही प्रदर्शनकारीहरू घाइते भएको सरकारी समाचार संस्था एनएनएले खबर दियो । 
 

विरोधकर्ताहरूले संसद् भवन नजिक भेला भएर सानो आगो बालेका र सुरक्षाकर्मीतर्फ ढुंगा फ्याँकेका थिए । 

विस्फोटमा परी लगभग १५० जना मारिएका छन् भने ५ हजारभन्दा बढी मानिस घाइते भएका छन् । बन्दरगाहको एक गोदाममा वर्षौंदेखि थुपारिएको अम्मोनियम नाइट्रेट विस्फोट भएपछि धनजनको क्षति भएको हो । 

जोर्डनका लागि लेबननका राजदूतले राजनीतिक नेतृत्वको गैरजिम्मेवारीपनको विरोध गर्दै बिहीवार राजीनामा दिएकी छन् । 
 

लेबननको एमटीभीबाट प्रसारण गरिएको बयानमा राजदूत ट्रेसी चामूनले सरकारको अक्षमतालाई आफूले अब नसहने बताइन् । 

उनीअघि सांसद मारवान हामादेले बुधवार राजीनामा दिएका थिए । 

आफ्ना प्रियजनहरूको शव गन्दै लेबननीहरूले विस्फोटका विषयमा आक्रोश पोखेका छन् । 

‘हामी अब यसलाई सहन सक्दैनौं । अब पुग्यो । यो पूरै प्रणाली नै जानुपर्छ अब,’ ३० वर्षीय मोहम्मद सुयुरले बताए । 

बिहीवार भएको सानतिनो विरोध प्रदर्शन अनि सामाजिक सञ्जालमा सरकारको विरोध गर्दै गरिएका आक्रोशित पोस्टहरू हेर्दा अब गत अक्टोबर महिनामा भएको चौतर्फी विरोध प्रदर्शन दोहोरिने सम्भावना बढेर गएको छ । 

प्रधानमन्त्री हसन दियाब र राष्ट्रपति मिसेल आयोनले विस्फोटका लागि जिम्मेवारहरूलाई कारावास सजाय दिने बताएका छन् । बन्दरगाहका १६ जना कर्मचारीलाई विस्फोटपछि पक्राउ गरिएको छ । 

तर घटनाको निष्पक्ष छानबिन हुने विषयमा लेबननीहरूलाई खासै आशा छैन । 

देशको नेतृत्व वर्गमाथि अक्षमता र भ्रष्टाचारको आरोप लामो समयदेखि लाग्दै आएको छ । गत अक्टोबर महिनामा व्यवस्था परिवर्तनका लागि विरोध प्रदर्शनहरू गरिएका थिए ।