ललितपुर, १० जेठ— एमाले—राप्रपा गठबन्धनलाई भत्काउँदै ललितपुर महानगरपालिकाको मेयर पदमा नेपाली कांग्रेसका चिरीबाबु महर्जन विजयी भएका छन् ।
राप्रपा—एमाले गठबन्धनका उम्मेदवार हरिकृष्ण व्यञ्जनकारलाई पराजित गर्दै महर्जन मेयर पदमा विजयी भएका हुन् ।
महर्जनले २४ हजार ६ सय ४२ मत ल्याउँदा निकटतम प्रतिद्वन्द्वी व्यन्जनकारले २४ हजार ३ सय १६ मत प्राप्त गरे । यस्तै उपमेयरमा पनि कांग्रेसकै गीता सत्याल १९ हजार ८१९ मत प्राप्त गरी विजयी भइन् । निकटतम प्रतिद्वन्द्वी साझा पार्टीकी शोभा शाक्यलाई ५ हजार ५ सय ७९ मतले पछाडि पार्दै उनी विजयी भएकी हुन् । साझाकी शाक्यले १४ हजार २४० मत प्राप्त गरिन् ।
को हुन् महर्जन ?
ललितपुरको पुल्चोकमा २०१४ सालमा जन्मिएका महर्जन त्रिभुनव विश्वविद्यालयबाट एमकम उत्तीर्ण हुन् ।
यसअघि उनी ललितपुर नगर र उपमहानगरमा तीनपटकसम्म निर्वाचित वडा अध्यक्ष थिए ।
एमाले— राप्रपा गठबन्धन असफलगएराती आएको ललितपुरको चुनावी नतिजाले एमाले राप्रपा गठबन्धन असफल सिद्ध भएको छ । एमालेको राम्रो प्रभाव हुँदाहुँदै ललितपुरमा राप्रपाको पनि राम्रो उपस्थिति रहेको मानिन्छ । तर, दुई पार्टीबीचको तालमेल रहँदा पनि कांग्रेस विजयी भएको हो ।
मनोयन दर्ता गराउने दिन बैशाख २१ गते एमाले संसदीय दलको कार्यालय सिंहदरबारमा एमाले अध्यक्ष केपी शर्मा ओली र राप्रपा अध्यक्ष कमल थापाबीच काठमाडौं र ललितपुरमा चुनावी तालमेल गर्ने समझदारी भएको थियो । जसअनुसार काठमाडौं र ललितपुरमै एमालेले मेयर र राप्रपाले उपमेयर पाएको थियो । गठबन्धनअनुसार राप्रपाले मेयर र एमालेले उपमेयरलाई सघाउनु पर्ने भएपनि त्यस्तो नपाइएको स्वयम् उम्मेदवारहरुले गुनासो गरेका छन् ।
ललितपुर महानगरपालिकाको राप्रपाको उपमेयर उम्मेदवार बाबुकाजी प्रधानले चुनावी तालमेल अनुसार आफूले भोट नपाएको भन्दै गुनासो गरे । मेयरमा कांग्रेस उम्मेदवारसँग एमाले उम्मेदवारले हारे पनि थोरै मनान्तरले हारेको भन्दै आफूलाई भने एमालेको भोट नआएको गुनासो गरे । उनी उपमेयरमा पराजित भए भए पनि साझा पार्टीकी उम्मेदवार भन्दा कम मत ल्याएर पराजित भएका छन् ।
यस्तै काठमाडौं महानगरमा पनि एमालेका विद्यासुन्दर शाक्यले फराकिलो मतान्तरले मेयरमा अग्रता लिइरहँदा राप्रपाका उपमेयर उम्मेदवार राजाराम श्रेष्ठ भने हार उन्मुख देखिएका छन् । यसले शीर्ष तहमा तालमेल भएपनि कार्यकर्ता स्तरमा तालमेल अस्वीकृत भएको देखाउने सो पार्टीसम्बद्ध नेताहरु बताउँछन् । श्रेष्ठले अहिले आफू यसविषयमा केहि नबोल्ने भन्दै अन्तिम परिणाम आएपछि पार्टीले गम्भीर समीक्षा गर्ने बताए ।
