मौसममा बदली भएसँगै त्रिभुवन अन्तर्राष्ट्रिय विमानस्थल सहितका अन्य विमानस्थलहरूमा उडान प्रभावित भएका छन् । 

भिजिबिलिटी कम हुँदा दिउँसो २ बजेदेखि उडान प्रभावित भएको त्रिभुवन विमानस्थलका प्रवक्ता चन्द्रलाल कर्णले लोकान्तरलाई जानकारी दिए  । 

उनका अनुसार दिउँसो २ बजेदेखि ८ वटा आन्तरिक उडान 'डाइभर्ट' गरिएका छन् । 

यस्तै १ अन्तराष्ट्रिय जहाज पनि ल्यान्डिङ हुन नसक्दा 'होल्ड'मा बसेको छ । 

मौसम प्रभावित हुँदा विभिन्न एयर कम्पनीहरूले उडान रोकेका छन् ।

बुद्ध एयरले सूचना जारी गर्दै भनेको छ,'काठमाडौंमा भिजिविलिटी समस्या देखिएको छ । हाम्रा उडानहरु पनि प्रभावित भइरहेको छ । असुविधाको लागि क्षमाप्रार्थी छौं । उडान सम्बन्धी अपडेट हाम्रो मोवाइल एपबाट हेर्न सकिन्छ । धन्यवाद ।'

मौसम विभागले भन्यो : अझै केही दिन यस्तै रहन्छ 

केही दिनयता पानी नपर्दा वातावरणमा हावा चलि रहेपनि बग्न नपाउँदा प्रदुषण बढेको मौसम विभागले बताएको छ । पानी नपर्दासम्म यस्तो रहिरहने बताउँदै विभागले केही दिनसम्म यस्तो भइरहने बताएको छ । 

विभागका एक कर्मचारीले लोकान्तरसँग भने,'केही दिनदेखि घाम पनि राम्रोसँग लागेको छैन, त्यसै कारण हावा बग्न पाएन । पानी नपरेसम्म यो समस्या नहट्न सक्छ ।'

ती कर्मचारीका अनुसार, भारतको राजस्थानमा बढ्दै गइरहेको प्रदुषण र नेपालका विभिन्न ठाउँमा बढिरहेको डढेलोको प्रभाव यता देखिएको हो । 

उनले पानी नपरेसम्म केही दिन यो समस्या रहिरहने बताए । उनका अनुसार, अझै केही दिन पानी पर्ने सम्भावना छैन । 

यसअघि २०७६ बैशाख अन्तिम साता पनि राजस्थानको धुलोले काठमाडौं ढाकेको थियो । 

जनस्वास्थ्य विज्ञ भन्छन् : दीर्घकालमा समेत यसको असर पर्न सक्छ

यता, धुलो धुवाँबाट जोगिन स्वास्थ्यकर्मीहरूले सुझाव दिएका छन् । 

जनस्वास्थ्य विज्ञ डा.रवीन्द्र पाण्डेले स्वासप्रश्वासका विरामीहरूलाई बढी असर गर्ने भन्दै सावधानी अपनाउन आग्रह गरेका छन् । 

उनले तत्कालिन रूपमा आँखा पोल्ने, आँखा चिलाउने, आँखा रातो हुने लगायतका लक्षणहरू देखिने र पछि दीर्घकालमा समेत असर पर्ने बताएका छन् । 

सकभर घर बाहिर ननिस्कन र निस्किहाले पनि शरीर ढाक्ने कपडा लगाउने, मास्क तथा चस्मा लगाएर निस्किन उनको सुझाव छ ।