कोरोनाभाइरस (कोभिड- १९) संक्रमण फैलिन नदिन भन्दै घोषित निषेधाज्ञाका कारण अन्य कैयन क्षेत्रजस्तै सैलुन र ब्युटीपार्लर पनि पूर्ण प्रभावित भएको छ ।

अघिल्लो वर्ष महिनौं प्रभावित भएको व्यवसाय लयमा फर्किन नपाउँदै करीब २ महिनादेखि पूर्णरूपमा ठप्प बनेको हो ।

सरकारले निषेधाज्ञालाई विस्तारै खुकुलो बनाए पनि यी व्यवसायलाई भने सञ्चालन अनुमति दिएको छैन । जसका कारण यसमा आश्रित व्यक्ति र उनीहरूको परिवारलाई हातमुख जोर्न पनि समस्या हुन थालेको छ ।

यस्तै पीडा भोग्ने मध्येका एक हुन्, २४ वर्षका सुनिल ठाकुर ।

घरायसी कारणले बीचमै पढाइ छाडेका ठाकुरले कपाल काट्ने पुर्ख्यौली पेशा अंगाले । कमाइ राम्रै थियो ।

अहिले आएर कोरोना महामारीका कारण हातमुख जोर्नै समस्या हुन थालेको छ ।

महामारीमा व्यवसाय बन्द भएपछि उनका बुवा काठमाडौं छाडेर घर फर्किसकेका छन् ।

अघिल्लो लकडाउनमा त घरमै पुगेर पनि कपाल काटेका उनी अहिले कसैले घरमा नबोलाउँदा थप समस्यामा छन् ।

मान्छेहरूले आफैंले मशिन किनेर टाटेपांग्रे भएपनि कपाल काटेर हिँड्न थालेको उनको गुनासो छ ।

निषेधाज्ञाका कारण भोकै मर्नुपर्ने अवस्था आउन लागेको दुखेसो ठाकुरले पोखे ।

लेडिज पार्लर चलाउँदै आएकी फूलचरण कुमारीको पीडा पनि उस्तै छ ।

नेपाल पिछडा वर्ग समाजको कोषाध्यक्ष समेत रहेकी उनलाई अहिले बच्चाको फी, कोठा भाडा र रासनका लागि पैसा कहाँबाट जुटाउने भन्ने चिन्ता छ ।

भोकै मर्नुपर्ने अवस्था आएको भन्दै उनले सडक संघर्ष चर्काउनुको विकल्प नरहेको बताइन् ।

आदित्य ठाकुर १६ वर्षका भए। उनी १० कक्षामा पढ्दैछन् । पढाइसँगै बुवालाई सघाउने इच्छाले कपाल काट्ने काम सिक्दै थिए ।

तर बीचमै आएको कोरोना महामारीका कारण उनले काम सिक्न पाएनन् ।

त्यसमाथि बुवाको समेत काम बन्द हुँदा परिवार चलाउनै मुस्किल परेको ठाकुरको गुनासो छ ।

धनुषाका देवन्त ठाकुरलाई पसल खोल्न नपाएको भन्दा बढी चिन्ता मानिसहरूले घरघरमै मशिनले कपाल काट्न थालेपछि भएको छ ।

घरमा पाँचजना बालबच्चा उनीसँग आश्रित छन् । कमाइको बाटो बन्द हुँदा अब सामान प्याक गरेर गाउँ फर्किनुपर्ने अवस्था आएको गुनासो उनले गरे ।

पीपीई सेट लगाएरै भएपनि काम गर्न तयार रहेको भन्दै ठाकुरले आफूहरूको पेशा बचाइदिन सरकारसँग आग्रह गरे ।

प्रधानमन्त्री, मन्त्रीदेखि जनतासम्म सबैलाई कपाल काट्नु परे पनि अहिलेसम्म कसैको ध्यान आफूहरूतर्फ नगएको नाई मजदुरहरूको गुनासो छ ।

सरकारबाट उपेक्षित महशुस गरिरहेका उनीहरूले सावधानी अपनाएर व्यवसाय चलाउने भन्दै सरकारसँग व्यवसाय सञ्चालनको अनुमति मागिरहेका छन् ।