काठमाडौं कारागारमा बसेर लागूऔषधको सञ्जाल चलाउने गरेको खुलेको छ । सो सञ्जालका १७ जनालाई लागूऔषध नियन्त्रण ब्यूरोले पक्राउ गरेपछि यस्तो खुलासा भएको हो । 

सिन्धुली कारागारबाट उपत्यकालगायत देशका विभिन्न ठाउँ लागूऔषध बिक्री वितरण गर्ने मुख्य नाइके भनिएका गुड्डु गुप्ताको सञ्जाललाई ब्यूरोले पक्राउ गरेर 'नेक्सस' तोडेको हो । 

भारत घर भएका गुड्डु अहिले लागूऔषध मुद्दामै १८ वर्ष कैद र १० लाख जरिवानासहित सिन्धुली कारागारमा कैद भुक्तान गरिरहेका छन् । उनले अर्का कैदी सन्तोष स्याङताङको सहयोगमा विभिन्न व्यक्तिहरूलाई तलबमा राखेर लागूऔषधको कारोबार गर्दै आएको खुलासा भएको छ । 

मंगलवार ब्यूरोले पत्रकार सम्मेलन गर्दै उनले तीन तहमा कर्मचारी राखेर लागूऔषधको कारोबार गर्दै आएको बताएको छ । 

ब्यूरोका प्रवक्ता एसपी जीवनराम श्रेष्ठका अनुसार उनले दीपक महर्जन, पन्च साङताङ र संगा्रम मोक्तानलाई पहिलो तहमा राखेर २० हजार मासिक तलब दिएका थिए । सुजन ठकुरी र दुई नाबालकलाई मासिक १५ हजार रूपैयाँ तलब दिएर लागूऔषध कारोवार सञ्चालन गर्दै आएको खुलेको एसपी श्रेष्ठले जानकारी दिए । 

सन्तोष र गुड्डुलाई कारागार व्यवस्थापन विभागले केही दिन अगाडि रौतहट करागार सरुवा गरेको थियो । 

त्यस्तै भारतीय नागरिक रम्भादेवी दासले पनि नेपालमा बसेर लागूऔषधको सञ्जाल सञ्चालन गर्दै आएकी थिइन् । उनीसहित ७ जनालाई पनि ब्यूरोले पक्राउ गरेको छ ।

उनले पनि उपत्यकाका विभिन्न होटलबाट भुषण लामा, कुष्णराम घुकुछु, विष्णुकुमार देउला, नानीमैया लामा, पप्पु यादव र मोहम्द रफिक रैन रद्दिनलाई प्रयोग गरेर लागूऔषधको सञ्जाल सञ्चालन गरिरहेको प्रहरीको भनाइ छ । उनीहरूलाई ७ हजार एम्पुल लागूऔषधसहित प्रहरीले पक्राउ गरेको थियो ।