स्याङ्जा जिल्लास्थित सेवा प्रदायक निकायमा आउने सेवाग्राहीलाई खोप कार्ड अनिवार्य गरेसँगै जिल्लामा खोप लगाउनेहरूको संख्या बढेको छ ।

जिल्लाका सबै स्वास्थ्य संस्थाहरूमा दुई दिन खोप अभियान सञ्चालन गरिएकामा अहिले तीनवटा स्वास्थ्य संस्थामा नियमित खोप अभियान जारी राखिएको स्वास्थ्य कार्यालयकी प्रमुख बसुन्धरा शर्माले जानकारी दिइन् । 

अहिले जिल्लावासीलाई पायक पर्ने गरी गल्याङ नगर अस्पताल, गह्राैं प्राथमिक अस्पताल वालिङ र शहरी स्वास्थ्य क्लिनिक पुतली बजार–१ मा नियमित खोप लगाउने  व्यवस्था गरिएको उनले बताइन् । 

सेवाग्राहीलाई खोप कार्ड अनिवार्यसम्बन्धी सूचना पाए लगत्तै पहिला नलगाएका मानिस पनि खोप लगाउन स्वास्थ्य संस्थाहरूमा आउने क्रम तुलनात्मकरुपमा बढेको प्रमुख शर्माको भनाइ थियो । 

खोप लगाउन डराउने, लगाएर के हुन्छ र ? भन्नेहरू अहिले सेवा नै नपाइने हो कि भन्ने चिन्ताले पहिलो मात्रा खोप लगाउन अस्पताल आउने गरेका वालिङ नगरपालिकाका स्वास्थ्य शाखा प्रमुख कमलप्रसाद पाण्डेले बताए । 

'पहिला थोरै संख्यामा मानिस खोप लगाउन आउँथे,' उनले भने, 'खोप कार्ड अनिवार्य गरेसँगै अहिले दैनिक एक सयभन्दा धेरै मानिस कोभिड-१९ को पहिलो मात्रा लगाउन आइरहेका छन् ।'