युक्रेनमा तीन सन्तानकी आमाले विशाल राइफल बोकेर तस्वीर खिचाएकी छन् । रुसले युक्रेनमाथि आक्रमण गर्न लागेको भन्दै उनीजस्तै हजारौं युक्रेनीहरू युद्धको तयारीमा बसेका छन् । 

मारियाना झाग्लो नामक ती महिला सैनिक हैनन् । मार्केटिङ अनुसन्धाता झाग्लो देशको रक्षाका लागि जुनसुकै कदम पनि चाल्न तयार छिन् ।

‘मेरा सन्तानले युक्रेनको समस्या विरासतमा नबेहोरून् र अहिलेको जोखिम उनीहरूले पनि भोग्न नपरोस् भन्नेमा म सचेत छु । यस समस्यालाई अहिले नै डील गर्नु राम्रो हुन्छ,’ मारियानाले बताइन् । 

‘परेमा हामी किएभका लागि लड्नेछौं । हाम्रो शहरको सुरक्षाका लागि हामी लड्नेछौं । गोली चलाउनुपर्ने भयो भने म गोली पनि चलाउनेछु,’ ज्ब्रोयार जेड–१५ राइफल देखाउँदै उनले बताइन् । 

यो शिकार खेल्ने राइफल भए पनि आफूलाई शिकारको इच्छा नलागेको उनको भनाइ छ । 

‘मैले जिन्दगीमा कहिले पनि शिकार गरेको छैन । केही सैनिकहरूले यो सर्वोत्कृष्ट राइफल हो भनेकाले मैले यो किनेकी हुँ,’ मारियानाले बताइन् । 

उनी र हजारौं अन्य युक्रेनीहरू सेनाको स्वयंसेवक दस्ता टेरिटोरिल डिफेन्स फोर्सेसमा हालै जोडिएका हुन् । रुससँगको सीमामा तनाव बढेपछि उक्त दस्ताका सदस्यहरूको संख्या बढेको छ ।