२३ असार २०८३, मंगलबार
जर्मन कार कम्पनी बीएमडब्ल्यूले प्रतिस्पर्धी मर्सिडिज बेन्जलाई पछि पार्दै आफ्नो कार संसारमा सबभन्दा बढी बिकेर आफू पहिलो स्थानमा कायम रहेको दाबी गरेको छ ।
पुस २८ गते एक प्रेस विज्ञप्ति जारी गरेर बीएमडब्ल्यूले यस्तो दाबी गरेको हो ।
बीएमडब्ल्यूले सन् २०२१ मा २५ लाखभन्दा बढी कार बिक्री भएको बताएको छ । आफ्ना प्रतिस्पर्धीहरूभन्दा अघि रही बीएमडब्ल्यूले प्रतिवर्षको बिक्रीको हिसाबमा सन् २०२१ मा ८.४ प्रतिशतको वृद्धि हासिल गरेको हो ।
बीएमडब्ल्यूले बनाएको पूर्ण विद्युतीय कारले सन् २०२० को तुलनामा दोब्बर बिक्री भएको छ । सन् २०२१ मा बीएमडब्ल्यूका कुल १ लाख ३ हजार ८ सय ५५ कार विद्युतीय कार बिक्री भएका छन् ।
कोरोनाभाइरस महामारीका कारण विश्वभरि आपूर्ति शृंखलामा देखिएको समस्याको सन्दर्भमा विचार गर्ने हो भने बीएमडब्ल्यूको यो सफलता प्रशंसायोग्य छ । महामारीको समयमा संसारभरिका कार कम्पनीहरूले सेमीकन्डक्टरको अभावको समस्या बेहोर्नुपरेको थियो ।
आधुनिक कार निर्माणमा सेमीकन्डक्टर अपरिहार्य वस्तु हो । कार कम्पनीहरूलाई सेमीकन्डक्टर चिप सहजै उपलब्ध नहुँदा समस्या परेको अवस्थामा समेत बीएमडब्लयूले यस बाधालाई छिचोल्दै ग्राहकहरूको विश्वास जित्न सफल भएको देखिन्छ । बीएमडब्ल्यू कारको भारी बिक्रीले त्यसलाई प्रमाणित गरेको छ ।
