कतै झडप, कतै उम्मेदवारमाथि कुटपिट त कतै दल अदलबदलका दृश्यसँगै स्थानीय तह निर्वाचनको उम्मेदवारी मनोनयनको समय सकिएको छ ।

निर्वाचन आयोगले मनोनयन दर्ताका लागि दुई दिनको समय दिए पनि ठूला दलका अधिकांश उम्मेदवार सोमवार मात्र निर्वाचन कार्यालयमा पुगे । केही स्थानमा साँझ ५ बजेपछि पनि उम्मेदवारी दर्ताको काम चलिरहेको छ ।

मुख्य पदमा एकभन्दा बढी आकांक्षी रहेकाले दलहरूले अन्तिम समयमा मात्र  टिकट बाँडेका थिए । टिकट बाँडफाँडको ढिलाइले पनि बागी र दल अदलबदललाई भने टार्न सकेन ।

उम्मेदवारी दिनेहरूले भारी मतले जित्ने दाबी गरेका छन् भने पार्टीबाट टिकट नपाएकाहरू बागी उम्मेदवार बनेका छन् ।

उम्मेदवारी मनोनयनको अन्तिम दिन देशभरका मुख्य घटनाक्रम र रोचक दृश्यहरूलाई नियालौं :​

केशव स्थापितको हुंकार र सिर्जनाले सम्झिएका ससुरा गणेशमान

काठमाडौं महानगरपालिका प्रमुखका एमाले उम्मेदवार केशव स्थापितले गठबन्धनको उम्मेदवारभन्दा दोब्बर मत ल्याएर जित्ने दाबी गरेका छन् ।

सोमवार उम्मेदवारी दर्ता गराउँदै स्थापितले आफू ‘सक्सेस फूल मेयर’ रहिसकेको भन्दै आफूले नै जित्ने दाबी गरेका हुन् ।

‘५४ सालमै ८४ हजार मत ल्याएको हुँ,’ उनले भने, ‘अहिले जति मत गठबन्धनले ल्याउँछ, त्यसको दोब्बर ल्याउँछु ।’ 

स्थापित २०५४ सालको स्थानीय निर्वाचनमा काठमाडौंको मेयरमा निर्वाचित भएका थिए ।

स्थापितले यौन दुर्व्यवहारसम्बन्धी प्रश्नमा असंवेदनशील खालको अभिव्यक्ति पनि दिए ।

एक पत्रकार र महानगरकै महिला कर्मचारीमाथि यौन दुर्व्यवहार गरेको पुरानै आरोपका सम्बन्धमा सोधिएको प्रश्नमा स्थापितले भने– ‘किन समयसमयमा यस्ता विवादहरू निकालिन्छ ? म जत्तिको व्यक्तिको इस्यु उठ्छ नि ! विवादमा नआउने पनि केशव स्थापित हुन्छ ? ५० वटा मुद्दा लागेका बेला ५ वटा मुद्दा थपिबक्सियोस् भन्ने मान्छे हो । त्यति चुनौती बोकेको मान्छेले बाहिर सडकमा उठ्ने इस्युमा ध्यान दिन हुँदैन ।’

***

काठमाडौं महानगरपालिका प्रमुखमा कांग्रेसका तर्फबाट सिर्जना सिंहले उम्मेदवारी दिइन् ।

सत्ता गठबन्धनको साझा उम्मेदवार समेत रहेकी सिर्जनाले उम्मेदवारीपछि सञ्चारकर्मीहरूलाई प्रतिक्रिया दिँदै आफ्ना ससुरा गणेशमान सिंहले गर्नुभएको संघर्षलाई शिरोपर गर्दै अगाडि बढ्ने बताइन् ।

'म गणेशमान सिंह र मंगलादेवी सिंहको बुहारी हुँ,' सिर्जनाले भनिन्, 'उहाँहरूले जनतालाई रैतीबाट नागरिक बनाउन जिन्दगीभर जसरी संघर्ष गर्नुभयो, त्यसलाई शिरोपर गर्दै राजनीतिमा अगाडि बढ्छु ।'

काठमाडौंको विकास र उत्थानका लागि काम गर्ने बताएकी उनले महिलाहरूलाई आफूले विशेष ध्यान दिने बताइन् ।

'काठमाडौं उत्थानका लागि, काठमाडौंको विकासका लागि र सबैलाई सुरक्षित भएको देखाउन मेरो ध्यान हुनेछ,' उनले भनिन्, 'काठमाडौं राजधानी भए पनि महिलाहरूलाई एकदमै दुख छ । काठमाडौं एकदमै साँघुरो भैसकेको छ । यहाँका महिलाहरूलाई मैले ध्यान दिनुपर्छ ।'​

चिरीबाबुको दाबी र हरिकृष्णको केजरिवालपथ

ललितपुर महानगरपालिका प्रमुखका कांग्रेस उम्मेदवार चिरिबाबु महर्जनले १५ हजारभन्दा बढी मतले जित्ने दाबी गरे ।

सोमवार मेयरमा उम्मेदवारी दर्तापछि प्रतिक्रिया दिँदै उनले आफूले मेयर हुँदा राम्रो काम गरेकाले फेरि पनि चुनाव जित्ने दाबी गरेका हुन् ।

‘शिक्षा, स्वास्थ्य, वातावरणका क्षेत्रमा राम्रो काम गरेको छु,’ उनले भने, ‘ललितपुरको कायापलट गर्न समक्ष भएकाले फेरि म नै जित्छु ।’

चिरिबाबु यसअघि सानो मतान्तरले विजयी भएका थिए ।

***

ललितपुर महानगरपालिका प्रमुखका एमाले उम्मेदवार हरिकृष्ण व्यञ्जनकारले उम्मेदवारी दर्ताका क्रममा दिल्लीका मुख्यमन्त्री केजरिवालको नाम लिए ।

व्यञ्जनकारले आफूले ललितपुरलाई केजरिवाल मोडेलमा विकास गर्ने बताएका हुन् । ‘भारतको दिल्लीका मुख्यमन्त्री केजरिवालले जसरी सरकारी सेवा, स्वास्थ्य, शिक्षालाई माथि उठाए, म पनि त्यही मोडेलमा काम गर्छु,’ उनले भने ।

उनले आफू सिंह भएको जिकिर पनि गरे । ‘हामी सिंह हौं, अरू स्याल हुन्,’ उनले भने, ‘हामीसँग जनता छन्, हामी जित्छौँ ।’

भरतपुरमा एकताको सन्देश दिने प्रयास अनि बागी उम्मेदवारी

भरतपुर महानगरपालिकामा नेपाली कांग्रेस र नेकपा (माओवादी केन्द्र)ले संयुक्त रूपमा उम्मेदवारी दर्ता गराए ।

महानगर प्रमुखमा माओवादीकी रेनु दाहाल र उपप्रमुखमा कांग्रेसका चित्रसेन अधिकारीले एक साथ उम्मेदवारी मनोनयन दर्ता गराएका हुन् ।

उम्मेदवारी दर्ताका लागि कांग्रेस र माओवादीको टोली दिउँसो करीब साढे ३ बजे र्‍यालीसहित निर्वाचन कार्यालयमा पुगेको थियो ।

र्‍यालीमा कांग्रेस जिल्ला सभापति राजेश्वर खनाल, माओवादी नेता एवं राष्ट्रिय सभा सदस्य नारायण दाहाल, माओवादीका जिल्ला संयोजक आरसी अधिकारी, कांग्रेसबाट निर्वाचित प्रदेश सांसद गीता वाग्ले समेत सहभागी थिए ।

भरतपुरमा आधिकारिक रूपमा एकताको सन्देश दिने प्रयास भए पनि कांग्रेस भित्रबाट बागी उम्मेदवारी समेत पर्‍यो ।

गठबन्धन गर्दा भरतपुरको प्रमुख (माओवादी केन्द्र)को भागमा परेपछि कांग्रेसका जगन्नाथ पौडेलले स्वतन्त्र उम्मेदवारी दिएका हुन् । पौडेल पूर्व सांसद समेत हुन् ।

पौडेलको उम्मेदवारी दर्ताका लागि कांग्रेस चितवनका पूर्व सभापतिहरू कृष्णलाल सापकोटा, टीकाराम न्यौपाने लगायत निर्वाचन कार्यालय पुगेका थिए ।

****

भरतपुर महानगरपालिका प्रमुखका एमाले उम्मेदवार विजय सुवेदीले मदन भण्डारी र जीवराज आश्रित तथा बीपी कोइरालाको शालिकमा माल्यार्पण गरी निर्वाचन कार्यालयमा पुगेर उम्मेदवारी दर्ता गराए ।

सुवेदी पार्टी कार्यालयमै रहेको मदन भण्डारी र जीवराज आश्रितको शालिकमा माल्यार्पण गरी क्यान्सर अस्पताल प्राङ्गणमा रहेको बीपी कोइरालाको शालिकमा माल्यार्पण गर्न पुगेका थिए ।

भरतपुरमा एमालेलाई राप्रपाले पनि सघाएको छ । उपमेयर भने राप्रपाको भागमा परेको छ ।

सुवेदी जनतामा लोकप्रिय छवि बनाएका नेता हुन् ।

पोखरामा बागीको लर्को

पोखरा महानगरपालिकामा कांग्रेसबाट तीन जनाले बागी उम्मेदवारी दिए ।

गठबन्धनको भागबण्डामा प्रमुख पद नेकपा (एकीकृत समाजवादी)को पक्षमा परेपछि कांग्रेसबाट ३ जनाले स्वतन्त्र उम्मेदवारी दिएका हुन् ।

कांग्रेसबाट नन्दप्रसाद तिवारी, विमल कार्की र ऋषि सापकोटाले प्रमुखमा स्वतन्त्र उम्मेदवारी दिएका हुन् ।

गठबन्धनका तर्फबाट नेकपा एसका धनराज आचार्य आधिकारिक उम्मेदवार बनेका छन् ।

सिन्धुपाल्चोकमा माओवादी-माओवादी झडप

सिन्धुपाल्चोकको चौतारा साँगाचाेकगढी नगरपालिकामा नेकपा माओवादी केन्द्रका कार्यकर्ताबीच झडप भएको छ । 

टिकट पाउने र नपाउने पक्षबीच झडप हुँदा साँगाचोकगढी निर्वाचन कार्यालयमा तनावग्रस्त स्थिति उत्पन्न भएको छ । झडपका क्रममा नगरपालिका ताेडफाेड समेत भएकाे छ ।

चौतारा साँगाचाेकगढीकाे वडा नम्बर १ र १४ काे वडा अध्यक्ष एकीकृत समाजवादीलाई दिएपछि टिकट नपाउने माओवादी केन्द्रका कार्यकर्ताले नगरपालिका ताेडफाेड गरेका हुन् । 

झडपका कारण मनोनयन दर्ता प्रक्रिया समेत केहीबेर अवरुद्ध भएको सिन्धुपाल्चाेकका प्रहरी उपरिक्षक रामेश्वरप्रसाद यादवले जानकारी दिए । स्थिति नियन्त्रणमा लिन प्रहरीले अश्रुग्यास पनि प्रहार गरेको थियाे । 

चौतारा साँगाचोकगढी–११ र १४ को वडाध्यक्ष नेकपा (एस)लाई दिएपछि माओवादी कार्यकर्ताहरूले आक्रोशित हुँदै निर्वाचन कार्यालय तोडफोड गरेका थिए । जसका कारण कार्यालयका शिशाहरू पनि फुटेका छन् । ३० मत पनि नभएको नेकपा (एस)लाई वडाध्यक्ष दिएको भन्दै माओवादी कार्यकर्ताहरू आक्रोशित भएका थिए ।

अर्कातर्फ चौतारा साँगाचाेकगढीका निवर्तमान प्रमुख अमानसिंह तामाङलाई टिकट नदिएपछि उनले स्वतन्त्र उम्मेदवारी दर्ता गराएका छन् ।

यसअघि उनी माओवादी केन्द्र छाडेर एमालेबाट मेयरको उम्मेदवार हुन खोजेका थिए । तर, माओवादी केन्द्रका नेताहरूले तामाङलाई मेयरको टिकट दिने आश्वासन दिएर एमाले प्रवेशबाट रोकेका थिए । 

अन्तिममा माओवादी केन्द्रले तामाङलाई टिकट नदिएर कृष्णप्रसाद सापकोटालाई टिकट दिएको छ । सापकोटा प्रतिनिधि सभाका सभामुख अग्निप्रसाद सापकोटाका भाइ पर्ने व्यक्ति हुन् ।​

एक हातमा फूलमाला,अर्को हातमा टिकट!

बाराको सुवर्ण गाउँपालिकाका निवर्तमान अध्यक्ष महेन्द्र राय यादव जनता समाजवादी पार्टी परित्याग गरी लोकतान्त्रिक समाजवादी पार्टीमा प्रवेश गरेका छन् ।

उनलाई लोसपाले पार्टी प्रवेशलगत्तै गाउँपालिका अध्यक्षको टिकटसमेत दिएको छ । ८ जना वडाध्यक्ष, सदस्यसहितको दलबल लिएर उनी लोसपामा प्रवेश गरेका हुन् ।

लोसपाका मधेश प्रदेश अध्यक्ष जितेन्द्र सोनल र जिल्ला अध्यक्ष नवलकिशोर सिंहले उनीहरूलाई फूलमाला, गम्छा, टीका लगाई स्वागत गरेका थिए ।

मेयर लड्न एसएसपीबाट राजीनामा,टिकट नपाएपछि स्वतन्त्र

प्रहरी वरिष्ठ उपरीक्षक (एसएसपी) बाट राजीनामा दिएका गोविन्द साहले नेपाली कांग्रेसबाट मेयरको टिकट नपाएपछि स्वतन्त्र उम्मेदवारी दर्ता गराए ।

कांग्रेसबाट धनुषाको विदेह नगरपालिकामा मेयर पदमा उम्मेदवारी दिने भन्दै २०७८ फागुन १० गते नै उनले एसएसपी पदबाट राजीनामा गरेका थिए ।

उनको नाम मेयरका लागि सिफारिश पनि गरिएको थियो । तर, कांग्रेसले योगेन्द्र यादवलाई टिकट दिएपछि साहले बागी उम्मेदवारी दिएका हुन् ।

'मेरो नाम सिफारिश गरिएको भए पनि कुनै पहिचान र अस्तित्व नभएका योगेन्द्र यादवलाई पार्टीले टिकट दियो,' साहले लोकान्तरसँग भने, 'उनलाई पार्टीले पचाउनै सक्दैन, सबै साथीहरूले उम्मेदवारी दिनुपर्छ भनेपछि विद्रोह गर्दै स्वतन्त्र उम्मेदवारी दिएको हो ।'

कार्यकर्ताबाटै कुटिए उम्मेदवार

कार्यकर्ताबाटै कुटिएपछि विश्वदेव श्रेष्ठबाट गोरखा नगरपालिका प्रमुखको टिकट खोसियो ।

टिकट पक्का भएपछि उम्मेदवारीका लागि फोटो खिचाउन स्टूडियोमा छिरेका श्रेष्ठलाई कांग्रेस कार्यकर्ताको एक समूहले कुटपिट गरेको थियो । कुटपिटबाट श्रेष्ठलाई सामान्य चोट लागेको छ ।

कार्यकर्तामा तीव्र असन्तुष्टि देखिएपछि कांग्रेसले बहालवाला मेयर राजनराज पन्तलाई नै टिकट दियो ।

***

खोटाङको दिक्तेल रूपाकोट मझुवागढी नगरपालिकामा हेलिकोप्टर लिएर उम्मेदवारी दर्ता गराउन पुगेका कांग्रेस उम्मेदवार कार्यकर्ताबाट कुटिएका छन् ।

नगरपालिका प्रमुखमा उम्मेदवारीका लागि पुगेका धर्मराज पोखरेल कार्यकर्ताबाटै कुटिएका हुन् । कार्यकर्ताले हातपात गरेपछि उनलाई प्रहरीले सुरक्षित स्थानमा लगेका थिए ।

टिकट बाँडफाँडको विषयलाई लिएर कांग्रेसमा विवाद छ ।

एउटै पदमा दुई जनालाई टिकट

महोत्तरीको बर्दिवास नगरपालिकामा नेपाली कांग्रेसबाट नगर प्रमुखको टिकट लिएर दुईजना निर्वाचन कार्यालय पुगेपछि तनाव भयो ।

प्रह्लाद क्षेत्री र चिरञ्जीवी हमाल दुवै मेयरको टिकट लिएर निर्वाचन कार्यालय पुगेका थिए ।

अन्तिममा हमालले पार्टी सभापति शेरबहादुर देउवाबाटै टिकट लगेपछि पार्टीको आधिकारिक उम्मेदवार बने ।

क्षेत्रीले भने स्वतन्त्र उम्मेदवारी दर्ता गराए ।