सुर्खेतको वीरेन्द्रनगर नगरपालिका–४, समावेशी टोलका ७० वर्षीय छविलाल बोहोरा ४४ वर्षदखि वीरेन्द्रनगर चोकमा जुत्ताचप्पल सिलाउँदै आएका छन् ।

सडकमा जुत्ता सिलाउँदा सिलाउँदै मुलुकमा ठूला–ठूला राजनीतिक परिवर्तन भइसके । यद्यपि जुत्ता टाल्ने छविलालको थलो फेरिएको छैन । 

चवालीस वर्षमा छविलालले धेरै पटक भोट खसालिसके । यद्यपि यस पटक भोट हाल्ने कि नहाल्ने ? उनी दोधारमा छन् । 

छविलालले भने, 'अहिलेसम्म मैले कति पटक भोट हालेँ गिन्ती छैन । नेताहरूले हाम्रो भोटको कदर गरेनन् । हाम्रा दुःख उस्तै छन्, फेरिएका छैनन् ।'

स्थानीय तहको निर्वाचनले गाउँ सहरमा प्रचारको लहर छ । त्यसले पनि छविलाललाई छोएको छैन । जुत्ता सिलाएकै ठाउँमा उम्मेदवार आएर मत माग्छन्, छविलाल हस् भन्ने सङ्केतको टाउको हल्लाउँछन् ।

छविलालले भने,'काम नगरी खान पाइन्न । तिनका कुरा सुनेर बस्ने फुर्सद छैन।' गोरखापत्र दैनिकमा मुना हमालले खबर लेखेकी छन् ।