भारतीय प्रधानमन्त्री नरेन्द्र मोदी आमा हीराबेन १००औं वर्ष प्रवेशको अवसरमा गान्धीनगर पुगेका छन् ।

गान्धीनगरमा आमालाई भेटेर उनले खुट्टा धुँदै आमालाई जन्मदिनको शुभकामना दिएका छन् ।

आमाले छोरा नरेन्द्रलाई मिठाइ खुवाउँदै आशिर्वाद दिएकी छन् ।

आमाको जन्मदिनमा आफ्नो बाल्यकाल सम्झिँदै मोदीले ब्लग लेखेका छन् । जसमा उनले गरीबीका कारण आमाले २–४ पैसा कमाउन अरुको घरमा भाँडा माझ्ने गरेको सम्झिएका छन् ।

‘घर चलाउन २–४ पैसा बढी मिलोस् भनेर आमाले अरुको घरमा गएर भाँडा माझ्नुहुन्थ्यो,’ उनले सम्झिए, ‘वडनगरमा हाम्रो माटोको भित्ता भएको घर थियो, जहाँ आमाबुवासँगै हामी भाइबहिनी बस्थ्यौं । त्यहाँ कुनै बाथरुम थिएन, कुनै शौचालय थिएन ।’

आफ्नी आमाले सानै उमेरमै आमा गुमाउनुपरेको समेत मोदीले सम्झिएका छन् । विश्वव्यापी महामारीमा आमाले आफ्नी आमा (मोदीकी हजुरआमा) गुमाउनु पर्दा मातृस्नेह नपाएको समेत उनले बताएका छन् ।